Jerusalem, Risaw:
Ka tnad shipai jong ka Israel, ha ka Sngi Ba-ar, ka la pyntip ba ki shipai jongka ki la sdang ban leit hiar thma sa na ryngkew ha ki shnong kiba don ha ka thaiñ Shatei jong ka Lebanon, hadien ba ka kynhun lehnoh Hezbollah, ka la pynbna ba ka la sdan ban kput bad ban hiar thma ia ki shipai ka Israel kiba don markhap bad ka Lebanon.
U heh pahara jong ka Lebanon u la ong ba ka Israel ka la pynlong ruh ym duna ia ka hynriew tylli ki jinghiar thma ha ka thain shathie jong ka Beirut hadien ba ki shipai jong ka Israel ki la bthah ia ki nongshong shnong ha khappud jong ka Lebanon ba kin kynriah noh na kitei ki bynta.
Kumta, la ong ba wat hapdeng ka jingkyntu bad jingai jingmut jong ki ri ka pyrthei ia ka Israel ba kadei ban jai-jai noh ïa ka jingïakynad bad kitei ki lehnoh ka Lebanon, hynrei la ong ba ka Israel pat naduh kaba sdang ruh ka la dep kren ba kan ïai bteng ban ïaleh pyrshah ïa ka Hezbollah bad ka la khang ïa ka bynta jong u khappud hadien ba ka la pynïap ïa u nongïalam jong katei ka kynhun kaba ju ioh jingkyrshan na ka Iran.
U myntri kam pohiing jong ka Israel, u Yoav Gallant, u la maham ba ka thma kam pat kut wat hadien ka jinghiar thma kaba jur ia ka Beirut kaba la pyniap ia u heh jong ka Hezbollah, u Hassan Nasrallah, ha ka taiew ba la leit bad kane ka la pynkhih win ia katei ka kynhun lehnoh Hezbollah jong ka Lebanon.
Kumta, la ong ruh ba ka Israel ka la pyntip sha ka nongsam tiar ialeh ba kongsan jongka- ka United States, halor kitei ki jingleit thombor bad jingleit hiar thma jongka ha kane ka sien, pyrshah sa ia ka kynhun lehnoh Hezbollah jong ka Lebanon pat namar ka jingai jingkyrshan jong katei ka kynhun ia ka Hamas kaba long ka nongshun jong ka Israel.
Hynrei, la ong ba u President jong ka US, U Joe Biden, ha ki khyndiat sngi ba la leit, u la pynpaw ka jingbym sngew iahap ia ka jingleit hiar thma jong ka Israel sha Lebanon, ha kaba u la kyntu ruh ia ka Israel ba ka dei ban pynkhat shuwa naka bynta ka jingsuk- jingshngaiñ jong kiwei ruh ki ri, kiba lah ban shah ktah lang ynda ka Israel ka leit ban hiar thma ia ka Lebanon bad lada ka Lebanon ruh kan ïakhun pyrshah ia ka Israel.
