Agartala, Risaw:
Uwei u briew uba la shah suba donkti ha ka kam khaïi briew u la shahkem noh ha Agartala, ha ka jylla Tripura ha ka sngi Palei. Ïa une uba la shahkem la tip kyrteng kum u Nazmul Hossain, une u la shahkem halor ki jingshah kynnoh ba u la donkti ha ka kam khaïi briew bad ba u la pynsuk ha ka jingwan rungtuh ki bar jylla.
Katkum ka jingïathuh ki heh pulit, la ong ba u Hossain uba sah ha ka thaiñ Matinagar kaba hap hapoh ka Sonamura Sub-Division kaba hap hapoh ka Sepahijala distrik, u la shahkem ha ka jingkhynra lang jong ki pulit ka Sonamura bad ki shipai ka tnat Border Security Force (BSF).
“Kane ka jingkem ïa une u briew ka dei shi bynta jong ka jingtohkit kaba dang ïaid shakhmat halor ka jingsuba ba u Hossain u don bynta ban pynsuk ïa ka jingwan rung be-aiñ jong ki nongshong shnong na Bangladesh bad ki Rohingya sha kane ka jylla”, la ong ki tyllong khubor kaba la wan na ki pulit.
Ka tyllong khubor ka la ïathuh ba ka kyrteng jong u Hossain ka la paw ha ka por ba la pynlong ïa ka jingtohkit ha kaba ïadei bad ka jingjia kaba la jia hashwa ïa kaba la buh jingujor ha ka jaka treikam jong ki pulit ka GRP.
Ha kaba ïadei bad ki jingïoh jingtip halor ka jingjia, la pynlong ïa ka jingtohkit bad ïoh ban kem noh ïa u Hossain. Hadien kane ka jingshahkem jong u, la ïalam sha ïingbishar ha ka sngi Palei, ha kaba ki pulit ki la kyrpad ban ïoh set patok ïa u na ka bynta ban bteng ïa ka jingtohkit kaba bniah.
