New Delhi, Risaw:
U Myntri Rangbahduh ka Israel, u Benjamin Netanyahu ha ka jingkren kaba u la pyllait paidbah ha ka Sngi Ba-ar, u la maham tyngeh ia ka Lebanon ba ka lah ban mad ia kajuh ka jingeh kumba long ka Gaza, lada ka dang iai ailad ia ka Hezbollah ba kan pynkharoi ia ki kam thombor ha ka khyndew jong ka bad kumjuh ruh sha ki ri marjan khamtam ha Israel.
Kane ka jingkren jong u ka long hadien ba ka tnat shipai jong ka Israel ka la byrngem ba kan ïakhun pyrshah ia ki kam thombor jong ki lehnoh Hezbollah khamtam ha ki bynta ba Shathie jong ka Israel, da kaba phah ruh ia ki shipai ïada ka Israel sha katei ka bynta khappud jong ka ri bad ha kajuh ruh ka por, ka tnat shipai Israel ka la dep maham bad phah kynriah lypa ia ki paidbah nongshong shnong ka Lebanon kiba don ha kitei ki bynta ba markhap bad ka Israel.
Kumta, ha katei ka sngi pat la ong ba utei u nongialam ba hakhlieh duh jong ka Israel, u la kren pyrshah ia ka Lebanon ba ka dei ban sngewthuh ba kam bit ban ailad ne ai jingkyrshan ia ki kam thombor jong kitei ki lehnoh Hezbollah kiba don hapoh u pud- u sam jongka. Hynrei, lada ka Lebanon kam patiaw ia kane ka jingmaham, kan hap ban mad ia ka jingeh bad ka apot kumjuh kumba ka Gaza ka mad ha kane ka por.
Namarkata ruh u Netanyahu u la kyntu ia ka Lebanon ba ka dei ban tehlakam noh ia kitei ki lehnoh da lade, lada ka kwah ban lait na ka thma bad ka Israel.
