Jerusalem, Risaw:
U Myntri Rangbahduh ka Israel, u Benjamin Netanyahu, ha ka Sngi Nyngkong u la byrngem ba un leit ban hiar thma ia ka Hezbollah ruh khlem jingisynei namar ka jingleit thombor ba shyrkhei jong katei ka kynhun lehnoh na Lebanon sha Israel ha kane ka sien.
Namar la ong ba ki lehnoh Hezbollah ki la ther ‘namding sha ka jaka treikam ki shipai ka Israel ha ka Sngi U Blei, ha kaba 4 ngut ki shipai Israel ki la kyllon iap bad palat 60 ngut ki briew ki la mynsaw na katei ka jingthombor jong ki lehnoh Hezbollah ha katei ka sngi.
Kumta, u Myntri Rangbahduh ka Israel u la byrngem bad kular ruh ba un pynhiar kput ia kitei ki lehnoh ka Lebanon na ka bynta ki paidbah jong ka ri, kiba la shah pynshitom beiñ ha kitei ki lehnoh Hezbollah ha katei ka Sngi U Blei.
