Shillong, Risaw 16
Ka Umphrew Sports Club ha ka sngi Saitjaiñ ka la pynlong ïa ka Inter House Football Tournament na ka bynta ki nongshong shnong, ba kynthup ïa ki khynnah, ki samla, kumjuh ki rangbah ba kin pynmlien ban ïalehkai na ka bynta ban pynbha ïa la ki sap ki phong bad na ka bynta ka koit ka khiah.
Ha kane ka jingïalehkai ba shisngi jong ki la ïa don lang u Bah P.T Sawkmie, MLA barim kum u kongsan, uba la pynpaw ïa ka jingkyrshan jong u ïa kane ka klob da kaba noh synñiang da ka khusnam pisa sha ka kynhun kaba wan ba nyngkong bad ba-ar ha kane ka Inter House.
Ha kane ka jingïakhun ka Blue House ka la rah ïa ka nam lahduh bad ka Green House ka la wan ba-ar.
Haba ai jingkren ha kane ka sngi, u President ka Umphrew SC u Bah Listarwell Nongbri u la pynpaw ba la kham slem ki khlem ïoh ban ïalehkai Inter Dong ne ki Inter House shuh hapoh shnong, hynrei ki sngewkmen eh ïa u Bah PT Sawkmie uba la kyrshan ïa ki ba kin ïoh ban ïalehkai pat sa shisien.
U la pyrto ïa ki kam jong u, uba ju ïai ïarap ïa ki jingdonkam jong ki Sports Club hapoh ka thaiñ naduh ki por ba u long MLA haduh mynta ba um long eiei shuh.
Katba na ka liang u Bah P.T Sawkmie u la pyntip ba shen un sa pynlong ïa ka Open To All Football Tournament na ka bynta ki klob kiba don hapoh Mawlai bad kumjuh na ka bynta ki shnong kiba marjan bad ka Umphrew, ka shnong kaba marjan bad ka Umroi, Ri Bhoi.
U la pyntip ruh ba un aiti ïa kane ha ka Umphrew SC ba kan pynlong ïa kane ka lympung ïalehkai khnang ba ki shnong ki thaw kin shongshit, khamtam ba kin lah ban kyntiew ïa ka phutbol hapoh ka thaiñ kaba long kaba donkam bha na ka bynta ki khun samla kane ka juk kaba mynta.
“Haba don ka ki lympung ïalehkai, ki khynnah ruh ki sngewtynnad ban kilanmet, hynrei lada ym don, ym sngewkwah hi ruh ban kilanmet,” ong u Bah Sawkmie. “Hynrei ki don pat kiba ïeit phutbol, lada don ne ym don ruh ki sngewtynnad ban kilanmet.”
Kumta u pynpaw ba u sngewkhia bha ha kine ki sngi kiba mynta bym ju don shuh ki lympung ïalehkai.
U la pynpaw ba u dap da ka jing-kmen ban ïohi ba ka Umrynjah SC ka la kiew kyrdan sha ka 3rd Division na 4th Division bad ka Mawtawar SC ka don ha 1st Division. Kumta u khmih lynti ba ka Umphrew ruh ha kawei ka sngi kan ïoh ban ïashim bynta ha ka 4th Division jong ka Shillong Sports Association.
