Shillong, Risaw 16
U Lionel Messi u la ïoh ïa ka hat-trick bad kaba pynlong ïa kane ka lahduh ha ka World Cup ka Argentina ban lah pynjem khnap ïa ka Bolivia haduh 6-0 kol ha ka lympung ïaknieh rung World Cup (CONMEBOL) ha ka sngi Balang.
Une u rangïalehkai ba la 37 snem ka rta u la lah ban pynpaw ïa ka jingtbit na ka bynta ban thep ïa kitei ki lai kol bad ïarap pynbud bol ar sien na ka bynta ban pynlong ïa katei ka kynhun jong u Lionel Scaloni ban ïoh ïa ka jingjop.
Utei u khlur ïalehkai uba la khur haduh phra sien ïa ka khusnam Ballon d’Or, u la pynkhih jar nyngkong eh ha ka minit kaba 19 hadien ba u rangïalehkai ‘dien ka Bolivia u Marcelo Suarez u la shah khanglad ha u Lautaro Martinez, uba la ïarap ban pynbuh bol na ka bynta u Messi.
Ki paidbah nongpeitkai ha Buenos Aires’ Monumental Stadium ki la ïoh ban lehkmen ha ka minit kaba 43 hadien ba u Julian Alvarez u la pynbud bol na ka bynta u Messi, hynrei u la poshat sha u Lautara Martinez, uba khlem pynlehnoh ïa kane ka kabu siar.
Shwa ban kut ka jingïalehkai jong ka kylla step u Alvarez u la ïoh ban thep kol na ka bynta ka Argentina hadien ba u Messi u la shut ïa ka free-kick na ka bynta ban pynbuh bol ïa utei u rangïalehkai shakhmat ka Atletico Madrid.
Hadien katto katne por ba la bteng ia ka kylla miet, ka Argentina ka la thep biang ïa ka kol kaba saw lyngba u Thiago Almada ha ka minit kaba 69. Ïa ka kol kaba san la thep da u Messi (84). Hadien ar minit une u rangïalehkai shakhmat ka Inter Miami u la thep biang ïa ka kol kaba lai bad kaba khatduh na ka bynta ban pynurlong ïa ka Argentina ban khur syndon ïa ka jingjop na ka daw ba ka liang pyrshah kam shym la lah ban pynphai wat tang shi kol.
Lyngba kane ka jingjop, ka Argentina ka dangbat ïa ka kyrdan ba hakhlieh napdeng ki shiphew tylli ki kynhun da kaba kamai 22 point na ki shiphew sien ïakhun, ha kaba ka la tam da 3 point ïa ka Colombia, kaba la wan ba-ar hadien ba ka la jop da 3-0 kol ïa ka Chile ha Barranquilla.
Ha kawei pat ka jingïakhun ka Uruguay bad ka Ecuador ki la ïasam mar shi point hadien ba kim shym, la lah ban thep kol haduh kaba kut ka jingïalehkai.
