Seoul, Risaw:
Ka North Korea ha ka Sngi Balang ka la pynbna ba palat 1.4 Million ngut ki samla jong kane ka ri, kynthup ia ki khynnah pule, ki la leit ban pyniasoh sha ka tnat shipai jong ka North Korea tang hapoh jong kane ka taiew. Namar la ong ba kitei ki khun samla jong ka ri, ki la mih shakhmat ha kane ka sien ban ïakhun pyrshah ia ki jingma kiba ap ia ka ri bad kumta ki la mih ryntih da kawei ka jingmut ban leit pyniasoh sha ka tnat shipai jong ka ri ban ioh ïakhun bad ïada ia la u jong u pud- u sam na ka kti jong ki nongshun.
Kane ka jingpynbna jong ka North Korea ba kitei 1 Million tam ki samla ka ri ki leit ban pyniasoh sha ka tnat shipai tang hapoh ki 2 sngi jong kane ka taiew, ka long ruh hadien ba la sakhi ia ki kynrum- kymram hapdeng katei ka ri Korea bad kawei pat ka ri Korea- ka South Korea. Kumba la ju iohi hi man ka por, ba ka South Korea pat ka ju iatrei lang bad ka US, ban pyntbit bad ban ai jinghikai ia ki shipai jong kitei ki arliang ri, ha kaba ka North Korea ka la kynnoh ba kane ka long ka jingpynkhreh jong kitei ki ri, ba kin ioh ban leit hiar thma lane ban leit thombor ia ka North Korea ha ka por bym lah ban tip.
