Shillong, Risaw 17
Kan long ka sien kaba nyngkong eh ïa ki ‘riew ïeit phutbol ka Jylla ba kin ïoh ban sakhi da la ki jong ki khmat ïa ki katto-katne ki jingïalehkai jong ka Indian Super League 2023-24 ha kane ka nongbah, hadien ba la pynbna ïa ka wat ba ar (phase 2) ha ka Sngi Balang.
Kine lai tylli ki jingïalehkai ki ban pynlong ha kane ka nongbah kin dei ki jingïalehkai ha la ïing (home matches) jong ka Northeast United FC ki ban sa pynlong ha u Rymphang bad Lber jong u snem ban wan.
Kat kum ka jingpyllait ïa ki prokram ïalehkai ba dangsah jong ka ISL, nalor ki jingïalehkai ha la ïing ki ban pynlong ha Guwahati, ka Northeast United kan ïoh ban pynlong ruh ïa lai tylli ki jingïalehkai (home matches) ha Jawaharlal Nehru Stadium kaba ha Polo, Shillong pyrshah ïa ka Mumbai City FC ha ka 7 tarik u Rymphang 2025, nangta ha ka 21 tarik u Rymphang pyrshah ïa ka Bengaluru FC bad ïa ka East Bengal FC ha ka 8 tarik u Lber 2025.
Lah ban kdew ba kane ka jingwanrah ïa kitei ki jingïalehkai Indian Super League sha kane ka nongbah ka la wan hadien ka jinglah ban pynurlong ïa ki jingïalehkai jong ka Durand Cup 2024 ha u Nailar mynta u snem hadien ba la lah ban pyndep ïa ka jingmaramot ïa ka JN Stadium ha ka por kaba biang. Ha kajuh ka por kan dei ka sien kaba nyngkong eh ïa katei ka lahduh jong ka Durand Cup, ba kan lah ban wanrah ïa lai tylli ki jingïalehkai (ha la ïing) sha kane ka nongbah.
Kumba ka long mynta ka NorthEast United ka la don mynta ha ka kyrdan ba hynriew ha kaba ka la kamai 5 point hadien ba ka la jop shisien, ïakhaid ar sien bad shah rem shisien.
