Shillong, Risaw 17
Ka ‘thei ïalehkai Kickboxing ka Jylla, ka Daniella I Wanda Mylliemngap na Lumdorbar, Lamparing ka la wanrah nam bad burom ïa ka ri hi baroh kawei da kaba khur ïa ka takma rnong ha ka “Asian Kickboxing Championship 2024” ba la pynïaid da ka Asian Kickboxing Federation kaba la sdang naduh 6 haduh 13 tarik mynta u bnai ha Cambodia.
Ka Daniella kaba long tang marwei na ka Jylla lyngba ka Meghataya State Kickboxing Association (MSKA), ban mihkhmat ïa ka ri India sha katei ka lympung, ka la lah ban khur ïa katei ka takma ha ka kyrdan ïalehkai Senior K1 Rules kaba hapoh 56 Kgs.
Kane ka jait jingïalehkai ka long kaba jwat bha na ka bynta ban ïoh ïa ki lad jingïarap na ka Sorkar Jylla namar kam pat ïoh rung hapoh ka Olympic. Pynban ha kum kine ki jingeh ki khynnah ïalehkai ka Jylla ki long kiba satar ha ka rukom ïalehkai bad bunsien kim ju wanphai thylli sha la ïing haba ki leit shim bynta ha ki lympung ïalehkai kiba long hapoh ka ri ne wat shabar ri ruh kumjuh.
Katkum ka jingpynpaw da ka Daniella la sngewthuh ba kam da ïoh por than ban pynkhreh bha ïalade ha shwa ban leit sha Cambodia namar kaba bun ka por ka la hap ban leit wad ki lad jingïarap la ka long na ki bor sorkar ne ‘riewshimet kiba don ïa ka mynsiem ban noh synñiang.
Shuh shuh ka la pynpaw ruh ba haba ka leit shim bynta sha Cambodia, bunsien ka sngewkutlad ïalade namar kiwei ki nongïalehkai na kiwei pat ki ri ki la long ba la pynkhreh bha. “Wat la nga thrang ban khur ïa ka takma ksiar, hynrei nga sngwkmen ba nga la lah ban khur ïa ka takma rnong.”
Na ka liang ka MSKA ha ka Sngi Balang ka la pynkup burom ïa katei ka khlur ïalehkai ha kaba la ïadon lang ki dkhot jong kane ka synjuk hapoh ka jingïalam u Bah Lorenzo P. Warjri kum u Working President, kumjuh ki dkhot ka Team Revolution kaba don ha Nongthymmai kaba long ka shlem saiñdur ïa katei ka samla naduh u snem 2022.
