Paris, Risaw:
U Myntri Rangbahduh ka Israel- u Benjamin Netanyahu, haba iakren bad ki nongthoh khubor ha ka Sngi Balang, u la iathuh ba ki shipai Israel ki la lap ia ki tiar thma jong ka Russia na ki ktem lehnoh jong ka Hezbollah ha ka jingleit khynra jong ki shipai Israel sha ki thaiñ Shathie jong ka Lebanon.
Namar u la ong ba katkum ki kyndon bad ki aiñ jong ka UN Security Council ba la wanrah ha u snem 2006, dei tang ka tnat shipai jong ka Lebanon kaba lah ban buh ia kitei ki tiar thma. Hynrei ha kane ka sien la shem pynban ia kitei ki tiar thma jong ka Russia na ki ktem jong kitei ki lehnoh Hezbollah kiba don ha khappud jong ka Lebanon bad ka Israel.
Wat la katta, la ong ba ka Israel kam shym la lap bun ia ki tiar ba la buhrieh da ka Hezbollah namar kitei ki lehnoh ki la tih shibun bah ki thliew krem bad ki jaka ktem ba kin shong rieh bad buhrieh ia ki tiar siat jong ki.
Kumjuh ruh ka US ka la pyntip ba ki shipai Israel ki la lap ia ki tup ki thma jong ka Russia bad China na Lebanon hapdeng ka jingleit khynra jong ka Israel sha ki ktem lehnoh jong ka Hezbollah sha ka thaiñ Shathie jong ka Lebanon ha kine ki khyndiat sngi ba la dep.
Na ka liang jong ka Israel, u Netanyahu u la ong ba katei ka jingleit khynra bad jingleit tur jong ka Israel sha Lebanon, ka long ban pyntikna ia ka jingshngaiñ jong 60,000 tam ki paidbah nongshong shnong ka Israel kiba la poi shatei sha shiliang ri bad ban ioh pynphai biang noh ia ki sha la iing (Israel).
Namar la ong ba kiba bun bah ki paidbah nongshong shnong ki la shu poi phet sakma namar ka jingiakynad hapdeng ka Israel bad ki lehnoh Hezbollah naduh ba ka Israel ka la leit ban kput ia ki lehnoh Hamas hapoh ka nongbah Gaza, ha kaba ki lehnoh Hezbollah pat ki la leit thombor bad pynthud ia ka Israel, da kaba dawa ruh ia ka Israel ba ka dei ban sangeh noh ia ka jingleit thombor sha nongbah Gaza.
Kumta, la ong ba naduh ba ka Israel ka la leit khynra bad leit hiar tham ia ki lehnoh Hezbollah sha Lebanon, ka jingiap ki briew ha Lebanon ka la poi kumba 1,373 ngut, katkum ka jingkheiñ ba la ioh ban buh da ka tnat ka koit ka khiah jong ka Lebanon.
Namar la ong ba ki lehnoh Hezbollah jong ka Lebanon, ki ai jingkyrshan ia ka kynhun lehnoh Hamas jong ka Palestine kiba ju synshar hi ia ka nongbah Gaza da ki phew snem mynta. Kumta, kitei ki lehnoh Hezbollah ki la leit thombor ia ka Israel bad byrngem ruh ia ka Israel ba ka dei ban sangeh noh shi syndon ia ka jingleit hiar thma bad jingleit thombor sha nongbah Gaza lada ka kwah ban lait na ki jingma ne ban iatyngkhuh bad katei ka kynhun Hezbollah. Nalor jong ka Hezbollah, ka kynhun lehnoh Houthi jong ka Yemen ruh ka la thombor ia kat ki jhad kiba leit poi sha ki bynta ka duriaw ba marjan bad katei ka ri bad ong ba kim dei ban iadei kam ne ban leit pynpoi tiar sha Israel.
