Shillong, Risaw 17
Ka Meghalaya kan pynkhreh ban pynlong ïa ka jingïalehkai ha la ïing pyrshah ïa ka Tripura ha ka lympung ïalehkai Ranji Trophy 2024-25 ka ban sdang naduh ka por 8 baje mynstep jong ka sngi Thohdieng ha madan ïalehkai kriket jong ka MCA ha Polo.
Kane kan dei ka jingïakhun kaba nyngkong ha ka kyrdan Elite ba ka Shillong kan pynlong ïa kane ka lympung ïalehkai kriket ba pawnam jong ka ri.
Kane ka dei ka jingjop sa ïa uwei pat u mawjam jong ka MCA da kaba ïoh rung sha ka kyrdan Elite mynta ka samoi lyngba ka jinglah ban ïalehkai bha ha ka samoi ba la dep ha ka Plate Group ha kaba ka Meghalaya ka la wan ba ar ha ka Hyderabad.
Kumba ka paw ha ka jingïalehkai nyngkong shabar na la ïing, ka Meghalaya hapoh ka jingïalam u Prabhakar Bairgond ka la shah rem noh da shi inning bad 65 run pyrshah ïa ka Services kaba la long ha nongbah Delhi. Katba ka jingïalehkai ba nyngkong jong ka Tripura pyrshah ïa ka Odisha ha Agartala la pynsangeh noh khlem da lah ban pynlong ïa ka jingïalehkai.
Ki rangïalehkai ka Jylla ki long u Aryan Borah, Akash Kumar Choudhary, Shembhalang Pyngrope, Bamanbha Shangpliang, Bijon Dey, Chengkam Sangma, Dippu Sangma (VC), Jaskirat Singh Sachdeva, Kishan Lyngdoh (C), Ram Gurung, Roshan Warbah, Swarajeet Das, Ajay Duhan (BCCI approved guest professional player), Sumit Kumar (BCCI approved guest professional player) bad u Anirudh B (BCCI approved guest professional player). Kiwei pat kiba la pynap lypa ki long u Adarsh Joshi, Anish Charak, Lerry G Sangma bad u Yogesh Tiwari.
