Shillong, Risaw 18
Ka jingwan kah dum noh ka suiñ bneng ka la theh umpjah ïa ka jingïalehkai ba nyngkong ha la ïing jong ka Meghalaya pyrshah ïa ka Tripura jong ka lympung ïalehkai Ranji Trophy kaba la long ha madan ïalehkai kriket ka JN Stadium, Polo, kaba la sdang naduh ka sngi Thohdieng jong ka taïew.
Ha kane ka sngi sdang la lah ban pynïalehkai tang 7.2 over. Kane ka jingïakhun ka dei na ka bynta ka Elite Group A.
Wat la kane ka jingïalehkai la ïoh ban pynïakhun tang khyndiat tylli ki over, ka Meghalaya kaba la jop ïa ka jingkynting pisa ka la ailad shwa ïa ka Tripura ba kan tied nyngkong. Ki ‘rang kawang bol ka Meghalaya ki la ïoh ban pynhap 2 tylli ki wiket jong ka Tripura bad ai tang 29 ron.
Ki ar ngut ‘rang kawang bol ka Meghalaya kiba la ïoh ban shim wiket ki long u Chengkam Sangma (1/11 tang ha ka ober kaba ar bad u Akash Kumar Choudhary (1/18).
Ha shwa ba kane ka jingïakhun kan khreh ban jam shakhmat, ka jingdum ka suiñ bneng ka la wan ba kan kah dum, kaba la pynlong ïa ki bor pynïaid ban pynsangeh noh shwa ïa kane ka jingïakhun da ka jingkhmih lynti ban lah ban sdang biang ïa ka hadien ba la dep bam ja sngi (lunch), pynban hangne ruh ka jinglong ka suiñ bneng kaba I long sui sui, kam pynshlan ïa ki bor pyniaid ban sdang shakhmat ïa kane ka jingïakhun bad ban rai syndon ban ap biang pat sa lashai ka sngi ban ioh ban pynïalehkai pura ïa kane ka jingïakhun hapdeng kine ki ar tylli ki jylla.
