Mumbai, Risaw:
Ki la don sa san ngut ki briew kiba la shahkem ha ka sngi Thohdieng ha kaba ïadei bad ka jingshah kynnoh ba ki la pynïap ïa u nongïalam jong ka seng NCP, u Baba Siddique ha kaba kane ka la nang pynkiew ïa ka jingdon jong kiba la shah kem ha kane ka jingjia sha ki khyndai ngut, la ïathuh ki pulit jong ka Mumbai.
Haba la ïohpdiang ïa ka jingtip kaba bniah, la pynlong ïa ki jingleit khynra da ka Crime Branch ha Panvel bad Karjat ha ka distrik ba marjan ha Raigad, ha kaba kane ka la pynlong ban ïohkem ïa kine ki san ngut ki briew kiba la don bynta ban ïasuhbuit ha ka ban leh ïa ka kam pyntriem, la ong u heh pulit.
Kine ki briew kiba la shah kem ki don ruh ka jingïadei bad ka kynhun runar jong u Lawrence Bishnoi, kaba la shah kynnoh ba ka la pynïap ïa u Siddique, la bynrap shuh shuh u heh pulit.
U Siddique u la shah siat bad shah pynmynsaw jur ha ka 12 tarik, Risaw hajan ka ophis treikam jong u khun jong u uba dei u MLA u Zeeshan Siddique ha Nirmal Nagar ha ka thaiñ Bandra jong ka Mumbai. Une u nongïalam ka Congress uba la kylla long u nongïalam ka seng NCP u la khlad noh hadien katto katne por haba u la shah sumar ha Lilavati Hospital.
