KYIV, Risaw:
U heh ka tnat ïada jong ka US- u Llyod Austin ha ka Sngi Nyngkong u la pyntip ba ba ki tiar ïakhun thma kiba la tip kum ki ‘THAAD Anti-Missile System’ ki la poi sha Israel bad ki shipai ka US ki dang pynbit- pynbiang ia kitei ki tiar ha Israel khnang ba yn ioh ban pyndonkam ha ka por ba donkam kyrkieh.
Kitei ki tiar thma ‘THAAD’ lane ki ‘Terminal High Altitude Area Defense system’, ki long ki tiar ïakhun kiba shyrkhei jong ka US bad ka US ka la phah ia kitei ki tiar thma sha ka Israel ba kan ioh ban pyndonkam kyrkieh lada don ki ri lehnoh kiba leit ban hiar thma ia ka ha ki por bym lah ban tip.
Hynrei, utei u heh ka tnat ïada ka US um pat shym la batai shai la kitei ki tiar ïakhun ki la long pynkhreh ne em ban pyndonkam noh.
Namar u President ka US- u Joe Biden, u la dep iathuh ba ka US kan sa phah ia kitei ki tiar ban tehlakam ia ki ‘namding, ha ryngkat bad 100 ngut ki shipai jong ka US sha Israel, ki ban iarap ia ka Israel ha ka jingpyndonkam ia kitei ki jait tiar.
Hynrei, ka United States ha kajuh ka por ruh ka la kyntu ia ka Israel ba ka dei ban kiar na ki jingiakynad bad kiwei pat ki ri, khnang ba kan ym wanrah ia ka thma bah hapoh ka thaiñ Middle East.
Watla katta, u Biden ha ka taiew ba la leit u la iathuh ba u la dep tip lypa ha kano ka por ba ka Israel kan sa leit ban kput ia ka Iran, hynrei u la ialeh ruh katba lah pat ban pyn jai-jai ia ka jingiakynad hapdeng kitei ki 2 tylli ki ri bad u ngeit ruh ba kan don beit ka lad ban pyniasuk bad pynkut noh ia ka jingiakynad hapdeng kitei ki arliang ri.
Namar la ong ba ka US ka la ialeh katba lah ban khang ia ka Israel ba kam bit ban leit thombor sha kiwei pat ki ri nalor jong ka Gaza bad ba ka dei noh ruh ban sangeh ia ka thma ha Gaza. Hynrei baroh ka shong sa tang ha ka rai jong ka Israel bad kumjuh ruh ha kito ki ri ba marjan jong ka Israel, la ki lah ne em ban tehlakam ia ki kynhun lehnoh kiba don hapoh u pud- u sam jongki.
