United Nations, Risaw:
U heh ka United Nations, u Antonio Guterres ha ka jing-iakren bad u President ka Russia- u Vladimir Putin ha ka Sngi Palei, u la ong ba ka jingleit hiar thma jong ka Russia sha Ukraine ka la pynkheiñ ia ki kyndon aiñ jong ka United Nations bad ki aiñ jong ka pyrthei, ba la maham ia kino-kino ki ri ba kim bit ban leit pynthut ne leit thombor ia ki para marjan ri.
Namar la ong ba utei u nongialam ka United Nations, u la ioh ban iakynduh markhmat bad u Putin dei ha ka jingialang jong ka kynhun BRICS kaba la pynlong ha ka nongbah Kazan jong ka Russia.
Kumta, ha katei ka jingiakren ba markhmat bad u Putin, u Guterres u la ong ha u Putin ba ka jingleit hiar thma jong ka Russia ia ka Ukraine ka long ka bym lah ban pdiang bad ka Russia ka dei ban pdiang noh ia la ki jingbakla bad ban wanrah noh ia ka jingiasuk bad ka Ukraine khnang ba ki ri ka pyrthei kin ioh ban shongsuk-shongsaiñ kumba ju long baroh shi katta ki snem ba la leit. Nalor kane u la ong ruh ka jingiadei jong ka Russia bad kiwei ki ri ruh kan bteng biang khnang ba kan lait na ki jingshah pynngat kyndon bad kan lah ban shah pynsah marwei kumba ka long mynta, ha kaba ki don sa tang kumba 2-3 tylli ki ri kiba ai jingkyrshan bad kiba dang treh ban iatrei lang bad ka Russia.
Namarkata, utei u heh ka United Nations u la ong ba u pdiang sngewbha ia ki jing-iakren iasuk lada ka Russia bad Ukraine ki kloi ban iasuk noh.
Namar kumba long mynta hi, wat ka khaii- pateng bad ka jingiaid lynti jong ki jhad kit mar na ka duriaw Black Sea ruh ka la thut naduh ba ka Ukraine bad Russia ki don hapdeng ka jing-iakhun thma bad katei ka bynta jong ka duriaw ka long kaba donkam tam na ka bynta ban pynpoi ia ki mar-bam bad kiwei kiwei ki mar sha kylleng ki ri jong ka pyrthei. Hynrei, u la ong ba ka jingiaid lynti lyngba jong katei ka duriaw, ka la thut noh naduh ba ka Russia ka la leit ban hiar thma ia ka Ukraine ha u Rymphang 2022.
Na ka liang jong ka UN, ka la ailad ia ka Ukraine ba kan shalan ia ki mar rep jong ka lyngba ka duriaw Black Sea, hynrei ka Russia ka la khang lad noh ia ka Ukraine ban leh ia katei ka kam naduh u snem 2023.
U Guterres bad u Putin ki la iakynduh khatduh ha u Iaiong jong u snem 2022. Ha kane ka sien pat, ki la ioh ruh ban iakren halor ka jinglong-jingman ha Middle East bad kane ka la pynlong ia utei u heh ka UN ban kyntu ia u Putin ba un sangeh noh ia ka thma ha Ukraine ha shuwa ba ka pyrthei baroh kawei kan um noh ha ki thma.
