Shillong, Risaw 25
Ka Meghalaya Police Football Team ka la long ka lahduh ha ka lympung ïalehkai Second Division Fooball League 2024 ba la pynïaid da ka Shillong Sports Association, hadien ba ka la lah ban pynliem noh ïa ka Nongkrem SC lyngba ka tie-breaker da 14-13 kol ha ka sngi Thohdieng.
Kine ar tylli ki kynhun ki la kiew kyrdan sha ka First Division ha kaba kin ïoh ban ïashim bynta naduh ka aïom ban wan jong u snem 2025.
Haba phai sha kane ka jingïakhun final kaba la long ha SSA Stadium kaba ha First Ground, Polo baroh ar ki kynhun ki pyrshang ban ïakhun tyngeh naduh kaba sdang. Watla kine ki kynhun ki la ïoh ïa ki kabu kiba biang, hynrei kim shym la lah ban thep kol haduh kaba kut jong ki 90 minit.
Ha ka jingshisha ïa kane ka jingïakhun final la dei ban pynïakhun ha ka por 2:30 nohphai sngi, hynrei na ka daw ka jingdum lyoh la hap ban pynkynriah ïa kane ka jingïakhun ynda la kem dum lyngba ki jingshai jong ki floodlight.
Kumta la pynïakhun biang ïa kine ki kynhun shaduh ka extra time, hynrei hangne ruh ym shym la don ba lah ban thep kol. Dei tad ynda la pynïashut noh da ka tie-breaker ba ka MLP ka la lah ban tam da 14-13 kol ïa ka liang pyrshah na ka bynta ban ïoh jingjop syndon.
U Wilbert Marbaniang jong ka Nongkrem SC u la khur ïa ka nam Top Scorer, katba u rangapkol ka MLP u Rikseng Sangma u la ïohpdiang ïa ka nam Man of the Match.
Ka jingïalehkai First Division ha ka sngi Saitjaiñ kan long hapdeng ka Mylliem SC pyrshah ïa ka Umphyrnai SC ha ka por 2:30 nohphai sngi, katba ka Lawsohtun SC ïa ka Nongkseh SC ha ka por 5:30 janmiet.
