Khliehriat, Risaw 25
Ka hat-trick ba la ïoh da u Santosh Taron ka la biang pura ïa ka Wahïajer Narpuh YSSC ban pynliem noh ïa ka Khliehriat West da 7-1 kol na ka bynta ban ïoh jingjop ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA) ha ka Sngi Thohdieng ha Diengshynrum, Khliehriat.
Ha kane ka jingïakhun u Santosh Taron u la ïoh ban thep ha ka minit kaba 26, 37 & 41 ha kaba la bynrap lang mar shi kol da u Paila Mukhim ha ka minit kaba 49, Den Mukhim (80), Bantei Sumer (85) bad u Any Manner ha ka minit kaba 88. Katba ïa ka shi kol jong ka Khliehriat West la thep da u Silgrak Pala ha ka minit kaba 78.
Haba phai sha kawei pat ka jingïakhun hapdeng ka Diengshynrum SC bad Byndihati CSC ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Ka jingïakhun mynta ka sngi Saitjaiñ kan long hapdeng ka Bataw YWSC pyrshah ïa ka Lumshken SC ha ka por 12 baje mynsngi, katba ka Tpepswer SSWO ïa ka Rymbai Wahshnong SC ha ka por 2:30 nohphai sngi.
