Shillong, Risaw 25
Ka kynhun ïalehkai U-17 ka India ka la bteng ïa ka jingjop ba ar ha ka Group-D jong ka AFC U-17 Asian Cup 2025 Qualifiers, hadien ba ka la lah ban pynliem ïa ka Turkmenistan da 1-0 kol ha ka sngi Thohdieng ha Chonburi Stadium, Thailand.
Ïa kane ka shi kol la thep da u Rishi Singh shwa ban kut ka jingïalehkai jong ka kylla step na ka bynta ban pynlong ïa ka India ban ïoh 6 points na ki ar sien ïakhun bad kan pynkhreh ban ïakhun ïa ka Thailand ha ka Sngi U Blei.
Ha kane ka jingïakhun u rangïalehkai ka Jylla u Manbhakupar Malngiang u la ïoh ban mih madan ha ka kylla miet ha ka jaka u Vishal Yadav.
Ka India kaba la lah ban pynliem haduh 13 kol ïa ka Brunei Darussalam, ka la ïakhun tyngeh naduh kaba sdang. Ha ka minit kaba 7 u Mohammed Kaif u la ïoh ïa ka kabu kaba biang, ka bol ka la her shabar na ka jar.
Hadien 2 minit ka India ka la ïoh biang ïa ka kabu ksiar, ha kaba u Levis Zangminlun u la ïoh ban shut ïa ka bol ba la pynbuh da u Hemneichung Lunkim hapoh ‘box’, hynrei um shym la lah lah ban thep kol.
Wat la ka Turkmenistan ka la ïashan tyngeh ban pyllait na ka jingshah thep, pynban ka India ka la thom naphang ban ïoh thep kol da kaba shut najngai. Ha ka minit kaba 35, u Zangminlun u la ïoh ban shut najngai hynrei um shym la lah ban thep.
Dei ha ka minit kaba 44 ba ka India ka la ïai bteng ban ïakhun tyngeh bad ka la lah ban pynkhih jar lyngba u Rishi Singh na ka bynta ban tam shi kol ha ka kylla step.
Na liang ka Turkmenistan ka la pyrshang ban ïakhun tyngeh ha ka kylla miet, hynrei da ka jingïashan tyngeh ki rangïalehkai ka India ka la pynlong ïa katei ka kynhun ban mad ïa ka jingshah rem.
