Colombo, Risaw:
Ki pulit ka Sri Lanka ha ka Sngi Palei ki la pyntip ba ki la ioh ban kem noh ia 3 ngut kiba thmu ban thombor ia ki nong Israel kiba shu leit shangkai pyrthei sha katei ka ri. Ka Sri Lanka ka la ioh ban kem noh ia kitei ki runar da ka jingphah jingtip jong ka tnat syntiat na India hadien ba la ioh jingtip ia ka jingdon jong ki ha Arugam Bay.
U Myntri ka tnat Public Security, u Vijitha Herath, u la ong ba ia baroh 3 ngut kitei ki runar la ioh ban kem noh da ka tnat Terrorism Investigation Division bad baroh 3 ngut ki dei hi ki nongshong shnong jong ka ri Sri Lanka.
Ia mynta hi, ka tnat tohkit jong ki pulit Sri Lanka ka dang bat ia kitei 3 ngut ban pynïaid ia ka jingtohkit kaba bniah, la katei ka khubor ka long kaba shisha ne em ba ki thmu ban thombor ia ki jaitbynriew nong Israel kiba leit rung sha katei ka ri.
Dang shen ha kine ki khyndiat sngi ba la leit, ki pulit ka Sri Lanka ki dang dep pynbna ia ka jingioh kem ia 2 ngut ki suba don kti ha ka jingthmu thombor ha ki 19 haduh 23 tarik Risaw. Ia kitei 2 ngut ruh la ioh ban kem noh lyngba ka jingphah jingtip jong ka tnat syntiat ka India.
