
Houston, Risaw:
Ka Elizabeth Francis, kaba long ka briew kaba tymmen tam ha United States, ka la khlad noh ha ka rta kaba 115 snem. Kane ka briew ka la leit suk noh ha ka Sngi Ba-ar, hapdeng ka jingiadon bad jingpynshngaiñ lang jong ki bahaiing- bahasem, ka la khlad noh hakhmat ka khun ksiew ka Ethel Harrison kaba dei ka nongri nongsumar ia ka baroh shi katta.
Ka Elizabeth Francis ka dei ka briew balai napdeng ki tymmen kiba la im slem tam ha ka pyrthei jong kane ka juk ba mynta. La ong ba katba ka dang im baroh shi katta, kane ka briew bun ba ka sah ha ka nongbah Houston bad Texas.
Haba iakren bad ki nongthoh khubor, katei ka ksiew kaba ju ri ia ka Elizabeth, ka la iathuh ba katei ka tymmen ka long ka briew kaba sngewtynnad haduh katta-katta bad dei kane ka daw kaba la pynsngewtynnad ia ka ban ri bad sumar ia kane ka tymmen bad ban pynlut bun ruh ka por bad katei ka meiieid jong ka.
La ong ba katei ka tymmen ka ju im ka jingim kaba bha bad kaba shongsuk-shongsaiñ namar kam ju klet ban ai nguh bad ban dwai ia u Trai nongbuh- nongthaw ba u la sumar bad ai ka met kaba koit ba khiah haduh ba kan da kynjoh sha katei ka rta.