Seoul, Risaw:
Ka North Korea ha ka Sngi Nyngkong, ka la kynnoh ia ka South Korea ba ka phah ia ki drone ban leit tur shapoh u pud- u sam jong ka na ka bynta ki kam saiñ pyrthei bad ki jingthmu thombor jong ka ia ka North Korea. Kumta ka la ong ruh ba kane ka long ka jingpynkheiñ ia ki aiñ ki kyndon ba la buh jong ka ri bad ka South Korea ka dei ban shim jingkitkhlieh bad ban ai ka jubab halor kane.
Namar la ong ba ka tnat ïada jong ka North Korea ka la pynbna ia katei ka khubor hadien ka jingwad bniah bad jingbuddien pura, ha kaba, ka la ong ba ka la lap ba dei ki drone jong ka South Korea kiba leit rung be-aiñ sha Pyongyang kumba lai sien ïaid lyngba ki bynta jong ka North Korea.
Hapdeng ka jingwad bniah ia ka jingleit poi kitei ki drone jong ka South Korea, ka North Korea ka iathuh ba ka la lap ia ki 230 tylli ki jingthmu leit rung be-aiñ jong ka South Korea naduh u Jylliew jong u snem 2023, kynthup ia ka jingthmu ban pynthut ia ka kam saiñ pyrthei ha North Korea.
Katkum ka kaiphod ba la ioh lum, ha ka 8 tarik u Risaw, la iohi ia kawei ka drone kaba leit rung na ki bynta Shathie jong ka Baengnyeongdo ha ka por shiteng miet bad kaba pynhap ia ki jakhlia sha ki jaka ba don ki shlem treikam ka tnat Kam bar ri bad ka tnat ïada ri jong ka North Korea.
Hynrei, haba iadei bad kane, ka tnat ïada jong ka South Korea ka la ong ba kam kwah ban pynphai nia ne kren eiei halor kitei ki jingkynnoh ba khlem nongrim jong ka North Korea. Katba, ka South Korea ka la ong pat ba lada ka North Korea ka kwah ban pynmih daw ban ioh kput ia ka Shathie, ka South Korea ruh kan pynphai da ka jubab kaba biang ka ban iahap bad ka jingleh jong ka North Korea.
Kumjuh ruh na ka liang ka North Korea ka la ong ba kan sa pynphai kylliang da ka jubab kaba khlaiñ haba iadei bad kitei ki jingleh jong ka South Korea.
Namar la ong ba ka jingiadei hapdeng kine ar tylli ki ri Korea, ka la nang sniew bad kylla dur naduh ba ka North Korea ka la phah ia ki balun kiba kit ia ki jakhlia ban leit pynhap dusmon sha South Korea. Kane ka la jia ha u bnai Jymmang bad pynlong ia ka South Korea ba kan pynbna paidbah ia katei ka jing-leh khlem-akor bad dusmon jong ka North Korea ha katei ka por.
Haba iadei bad kane, ka South Korea bad ka United States ki la kynnoh ba ka North Korea ka la phah ia kumba 3,000 ngut ki shipai thma jong ka sha Russia, khnang ba ka Russia kan ioh ban pyndonkam ia ki hapdeng ka jingleit hiar thma jong ka sha Ukraine ha kine ki sngi ban wan.
