Jalisco, Jylliew:
Uwei u ‘riew shlur ba phylla uba la tip online kum u “Mexican Batman” lane u “Batman of Lagos de Moreno” u la kylla long ka mat ba kongsan ha kane ka kynti, ha kaba ki pulit katei ka nongbah Jalisco jong ka ri Mexico, ki la thwet shitom ban lap ïa u, hadien ba la kynnoh ba u la thwet ïa ki nongtuh thuk-thuk, da kaba shoh ïa ki bad teh ïa ki ha ki dieng sainar ilekstrik. Ka jingjia kaba phylla kaba la sdang jia naduh ka 13 tarik u Jylliew ha ka nongbah Lagos de Moreno bad kaba la pynlong ïa ki bor pyniaid ban tohkit ïa ka 5 tylli ki jingjia kiba iasyriem bad kiba la jia tang hapoh jong ki 10 sngi. La ong ruh ba man ka por ba ju lap ïa kum kine ki jingjia, la lap ba la teh ïa ki nongtuh ha ki dieng sainar ilektrik da ka ‘duct tape’ kaba heh, katba ïa ki thuk- thuk ba la ngeit ba ki shu tuh pat, la pynieng lang ruh hajan ka jaka ba la teh ïa ki.
Katkum ki dur ba la saphriang paidbah hapoh ka rynsan ‘X’ ki pyni ïa ki katto katne ki shynrang kiba la shah teh, ha ryngkat ki tmaiñ miaw ba la dro ha ka dur khmat jongki, ryngkat bad ka kyntien “ratero” (ka ktien Spain ban pyni ba ki long ki nongtuh) ba la thoh ha ka shyllang-mat jongki. Ha kawei pat ka jingjia, la iohi ïa arngut ki briew kiba la shah teh ha u dieng sainar ilektrik ha ryngkat ka dak jingmaham kaba rong pink kaba thaba.
Katkum ki khubor, utei u nong-ai jingsneng, uba ki paidbah ki la khot sin ïa u- da u “Batman of Lagos de Moreno”, u mih pyrthei bad treikam tang ha ka por mynmiet lane shiteng miet bad la iohi ruh ba u ju ieh noh ïa ki thuk- thuk ba kitei ki runar ki ju tuh, da kaba pynieng hajan ka jaka ba u la teh ïa ki hi, kum ka dak ban pyni ïa ka jingdon kti jongki ban tuh ïa kitei ki thuk- thuk ba la pynieng hajan jongki.
Watla katta, la ong ba hapdeng ka jingiashah jong ki paidbah halor katei ka jingleh jong utei u ‘riew shlur, ki pulit ki pyllait im bad ñiew ïa kitei ki nongtuh kum ki nongshah thombor, ym kum ki nongtuh ne nongleh kam sniew. U Secretary jong ka tnat pahara jong ka jylla, u Juan Pablo Hernandez, u la ong ba ki bor pyniaid ki dang iaid shakhmat ban wad ïa utei u briew u bym ju pynpaw dur ïalade bad ki la ithuh ïa ar tylli ki thuk- thuk kiba lah ban don jingiadei bad kitei ki kam thombor. Ki nongtohkit ki dang pyrshang ruh ban lap hato ki jingjia ki dei ki kam jong uwei u briew ne dei ka jingiatreilang jong kano- kano ka kynhun, kaba thwet ïa kitei ki nongleh kam sniew.
Ha kaba kut la pyllait noh ïa kitei ki nongtuh da ki pulit bad la sumar ïa ki, na ka jingmynsaw kaba ki la mad ha ka por ba ki shah thombor. Hynrei la ong ba ym shym la bna eiei shuh la ki pulit ki dang pyniaid ne em ïa ka jingtohkit haba iadei pat bad ka jingleh kam tuh jongki.
Kitei ki jingjia, ki jia ha kum kane ka por ba ka jur bha ka kam tuh thuk- thuk ha Lagos de Moreno, kaba la wanrah ïa ka jingsngewsih hapdeng ki nongshong shnong. Ka jingïakhih jong ki vigilante naduh katei ka por ka la paw bha ha kylleng ki platform ba kynthup ïa ka TikTok, X, bad Instagram, ha kaba bun ki nongpyndonkam ki la ïaroh ïa utei u briew uba la tap khmat namar ba u la shimkhia pyrshah ïa ki nongleh kam sniew kiba la i-shan khmat.
Hynrei kiwei pat ki la maham ba ka jingbishar hok jong ki nongpeitngor ka buh ïa ka nuksa kaba ma. Ki nongïakhih ïa ka hok longbriew manbriew ki kynthoh ba ka jingshim ïa ka aiñ ha la ki jong ki kti ka buh jingma ban pynjur ïa ka jingïakynad bad pynduhjait ïa ka rukom bishar hok, khlem da kheiñ ïa ki jingkynnoh pyrshah ïa kito kiba shah thombor.
