Stade, Jylliew:
Ki pulit ka Germany ha ka Sngi Nyngkong ki la pynbna ba la lap ïa 6 tylli ki metiap jong kiba ngat ha ka jingjia synreit kuli naphang hapoh ka nongbah Stade jong ka Germany ha katei hi ka sngi.
La kem ïa utei u briew uba la suba ba u dei u nongsiat bad ïa u nongleh kam sniew uba ar, ong u nongaiktien jong ki pulit ha ki nongthoh khubor ka AFP. Katkum ka jingiathuh ki pulit, utei u suba don kti, u la synreit kuli naphang hajan kawei ka jaka jong ki samla bad mynta ki dang pynlong ïa ka jingkhynra kaba heh shabar jong ka thaiñ sor. “Ngi kyrpad ïa phi ban mih noh na katei ka jaka bad ai ïa ka jaka shong kaba heh na ka bynta ka jingshngaiñ jong phi hi,” la ong ki pulit ha ka X post.
Shuh shuh ruh ki pulit ki la pyntip ba ki la ioh kem ruh sa ïa uwei pat u briew bad ïa kawei de ka paralok jong u, kiba la suba ba ki don kti ha katei ka kam thombor kaba la jia ha katei ka sngi.
U nongaiktien jong ki pulit u la ong ba ki nongtohkit ki ngeit “kam dei ka kam pyniap kynthei, bad kam dei ruh ka jingiadei bad ka jinglong sain pyrthei ne kano kano kaba kum kata. Hynrei, ka dei ka jingjia ba sngewsih ha ka iing ka sem kaba heh.”
Ka Stade, kaba don sha ka phang Sepngi jong ka Hamburg, ka don kumba 50,000 ngut ki nongshong shnong.
Ka Germany ka don ïa ki aiñ suloi kiba kham pyrkhing ban ïa ki aiñ jong ka US bad ki jingjia synreit kuli ha ki jaka paidbah ki kham duna. Kino- kino kiba hapoh 25 snem ka rta ki donkam ban pass ïa ka eksamin jong ka jingpang pyrkhat shwa ban apply ïa ka laisen suloi.
Kawei na ki jingshah siat pathar ba dang shen ha Germany ka la jia ha u bnai Lber 2023, ha kaba uwei u dkhot barim jong ki Nongsakhi u Jehobah uba sngewsih u la siat iap ïa hynriew ngut ki briew na ka balang jong katei ka kynhun Khristan ha Hamburg, shwa ban pynphai ïa ka suloi sha lade.
