Mawkyrwat, Risaw 28
Ka PNR Jr FC ka la rung sha ka quarter final ha ka lympung ïalehkai Golden Jubilee Knockout Football Tournament 2024 ba la pynï-aid da ka Nonglang Sports Club. Kane ka la wan urlong hadien ba ka la lah ban pynliem ïa ka Teilang SC da 1-0 kol ha ka Sngi Saitjaiñ ha madan Pyndenïew Lyngdoh, Nonglang, South West Khasi Hills.
Kane ka shi kol ka dei kaba la wan lyngba na u Boylanson Shangpliang ha ka minit kaba 26.
Ha phai pat sha ka kylla miet, ka Teilang FC kam shym la duh jingkyrmen bad ka la ïakhun tyngeh ban ïoh pynphai. Wat lada ka Teilang ka la ïoh shibun ki kabu Ksiar, hynrei baroh ki jingpyrshang ki la pulom lut namar kam shym la lah ban pynkhih jar haduh ban da kut ka jingïalehkai.
Ïa ka khusnam Man of the Match ha katei ka sngi la ïohpdiang da u Boylanson bad ïa katei ka khusnam la ïa sam da u Bah Syntarlin Snaitang, President Nonglang SC.
Ka Nonglang SC ka la pyntip ruh ba ka jingïalehkai ka ban bud kan long ha ka 31 tarik hapdeng ka Ïatylli SC pyrshah ïa ka Mawsynrap SC.
