Shillong, Risaw 28
Ka Manchester United ka la ïakhlad lok noh bad u manager u Erik ten Hag, la pynbna kane ka klob jong ka Premier League ha ka Lah Sngi U Blei hadien ba ka United ka la don ha ka kyrdan ba 14 na ki khyndai sien ïakhun.
Kane ka rai ka la wan hadien ba ka United ka la shah rem noh ha ka West Ham da 2-1 kol ha ka Sngi U Blei bad ban pynlong ïa ka United ban shah rem saw sien.
“U Erik ten Hag u la iehnoh ïa ka kam kum u manager jong ka Manchester United,” la pynthikna ka klob ha ka kyrwoh bad u Ruud van Nistelrooy un shimti shipor ïa kane ka kynhun tad haduh ban da ïoh ïa coach ba pura.
U Ten Hag, 54 snem ka rta, u la mad ïa ka jingshah kynthoh kum u manager ha kiba bun na ka samoi ïalehkai ba la dep hadien ba ka United ka la wan ha ka kyrdan kaba phra ha ka Premier League, kaba dei kaba sniew tam jong ki ha kine ki snem.
Kane ka long ruh hapdeng ki jingkylla ha kaba u heh spah jong ka ri Bilat bad u chairman jong ka INEOS u Jim Ratcliffe u la shimti ban pynïaid ïa kane ka kynhun ïalehkai.
Wat hapdeng ka jingjop kaba phylla ha ka final jong ka FA Cup pyrshah ïa ka Manchester City bad pynshong nongrim ïa ka jingbym biang jong ka jingïalehkai namar ki jingmynsaw kiba bun, u Ten Hag u la ïoh biang ïa ka kabu bad wat ka la soi ïa ka jingïateh kular haduh u snem 2026.
Hynrei ka jingïalehkai ha kaba sdang jong ka kynhun ha kane ka samoi ka la pynpaw ba u Ten Hag u lah ban nym lah ban pynkylla ïa kiei kiei na ka bynta kane ka klob.
U Ten Hag, uba la shah thung na ka Ajax, u la don ïa ka kam kaba khia ban kyntiew biang ïa ka Manchester United sha ka burom kaba mynshwa, namar ba kane ka klob ka la ïakhun tyngeh naduh ba la shongthait noh u manager ba pawnam u Alex Ferguson ha u snem 2013.
Wat lada u la lah ban kyntiew ïa katei ka klob ha ka League Cup bad ruh ha ka FA Cup ha ka samoi ïalehkai ba nyngkong jong u ha Old Trafford, hynrei u Ten Hag um shym la lah ban pynbha shibun ia ka jingïalehkai sniew tam jong ka klob ha ka league ha kine ki lai phew snem tam.
Ka kam jong u Ten Hag ka long ban kyntiew ïa ka klob hadien ka jingjop ïa ka Manchester City, hadien ka jingïalehkai bha ha ka phainal jong ka FA Cup ha u Jymmang bad ruh ka jingbishar bniah ha kaba kut jong ka aïom ïalehkai. Kumta la pynjlan ïa ka jingïateh kular jong u da shisnem, kaba la pynlong ïa u ban ïai neh ha ka klob haduh u snem 2026.
U Ten Hag u dei u manager ba pura uba phra ban shimti ïa ka United naduh ba u Ferguson u la mih noh da kaba bud ïa ki dienjat jong u David Moyes, u Louis van Gaal, Jose Mourinho, bad u Ole Gunnar Solskjaer.
Te kumta ka jingïakhun ka ban wan jong ka United ha la iing kan long pyrshah ïa ka Leicester ha ka English League Cup ka ban long ha ka sngi Balang.
