Shillong, Risaw 31
Ka Nongthymmai SC ka la pynliem noh ïa ka Nongrim Hills SC da 3-0 kol na ka bynta ban ïoh ïa ka jingjop kaba nyngkong ha ka OC Blue Shillong Premier League 2024 ha ka Sngi Palei ha SSA Stadium kaba ha First Ground, Polo.
Kane ka nam jop la wan urlong lyngba ki kol ba la thep da u Michaelson Kurbah (40), Ronald Singh Shaikhom (57) bad u Istarbor Marngar (59) na ka bynta ban pynlong ïa ka Nongthymmai ban ïoh ïa ki lai point. Kane ka la pynkut ruh ïa ka jingshah rem kaba hynñiew sien ha ki jingïakhun jong ka SPL 2023.
Hapdeng ka jingkhriat bad ruh ka jingrakhe ïa ka Diwali lyngba ki jingpynbthei ïa ki bom pataka ha kylleng ka nongbah, ka Nongthymmai ka la trei shitom ban ïakhun ïa ka liang pyrshah bad u Michaelson u la ïoh ban pynkhih jar nyngkong eh.
Ha ka kylla miet, u Ronald, hadien ar minit ba u la shut ba ka la leit die na diengkol, u la lah ban pynurlong ha ka minit kaba 57 ha kaba u rangapkol ka Nongrim Hills, u Urbanity Makhroh um shym la lah ban khanglad na ka jingshah thep. Hadien ar minit kane ka kynhun ka la thep biang ïa ka kol kaba lai lyngba u Istarbor.
Ka Nongrim Hills ka la ïoh ïa ki katto katne tylli ki kabu kiba biang ban thep kol hynrei kam shym la lah ban pynurlong na ka daw ka jingïashan tyngeh u nongapkol ka Nongthymmai u Roni Das.
Ka la long ka jingïalehkai kaba pynduh jingkyrmen ïa ka Nongrim Hills kaba don ha ka kyrdan ba ha khlieh duh jong ka miej ïakheiñ point da kaba kamai 4 poiñ. Kata ka jingkheiñ ka long kaba ïalam bakla khyndiat, hynrei ka jingjop jong ki ka long lyngba ka ‘walkover’ namar ka jingeh jong ka Laitkor SC ha kaba ïadei bad ka jingpynrung kyrteng ïa ki nongïalehkai ha ka jingïakhun kaba nyngkong.
Te kumta lyngba kane ka Nongthymmai ka mut ba baroh 10 tylli ki kynhun ki la lah ban khur kawei ka jingjop ha kane ka samoi ïalehkai bad ki don san tylli ki klob kiba ïoh mar 3 point kata ka Rangdajied United FC, Nangkiew Irat SC, Nongthymmai, Ryntih FC bad ka Langsning FC.
Ka Nongthymmai kan pynkhreh ïa ka jingïakhun ka ban wan ha ka 4 tarik pyrshah ïa ka Laitkor SC ha ka por 5:30 janmiet.
