Shillong, Risaw 23
U Myntri Rangbah ka Jylla u Conrad K Sangma u la pynpaw ba ka Meghalaya kan sa long ka Jylla kaba bun eh ha ka jingdon ïa ki madan siang phlang plastik ne artificial turfs ha ri India.
Haba ai jingkren ha ka jingplie ïa ka madan phlang plastik ha Siju kaba ha South Garo Hills, u Conrad u la ong, “Ka Jylla ka ïaid shakhmat ïa ka jingshna ïa 58 tylli ki madan phlang plastik, kawei ha manla kawei ka konstitwensi, ha kaba ka jingmang pisa ka long palat ïa ka T. 300 klur tyngka. Ynda la dep pyndep, ka Meghalaya kan sa long ka jylla kaba bun tam ha ka jingdon ïa ki madan Artificial Turf ha India.”
“Haba kheiñ kyllum, palat T. 2000 klur la bei tyngka ha kine ki 8 snem na ka bynta ki jingtei ïa ki jaka ïalehkai ba kynthup ïa ki stadium, ki madan ïalehkai phutbol, ki pung jngi bad ki indoor stadium ha baroh ki 60 tylli ki konstitwensi,” u la bynrap.
U Conrad u la ong ba ki samla bad ki jingïalehkai ki long kiba kongsan bha na ka bynta ka lawei jong ka Jylla. “Lada ngi kwah ban pynlong ïa ka Meghalaya kum kawei na ki jylla kaba kynsai, ngi dei ban ailad ïa ki samla jong ngi ryngkat bad ka pule puthi bad ki jingtei. Ka Meghalaya kan pdiang ïa ka National Games ha ka sien kaba nyngkong ha u Lber jong u snem 2027. Kumba 15 hajar ngut ki nongïalehkai, ki coach bad ki official kin ïashim bynta. Ka thong jong ka Sorkar ka long ba ki samla ïalehkai na Siju ki dei ban khur takma ym tang ha ka National Games, hynrei ban mihkhmat ïa ka Jylla bad kumjuh ïa ka ri India ha ka Asian Games bad Olympics ha ka lawei ka ban wan,” la bynrap biang u Conrad.
