Shillong, Risaw 23
Ki nongïalehkai ba don jingduna ha ki dkhot met (para-athletes) jong ka ri India ki la lah ban pynpaw ïa ka jingtbit ha ka sngi kaba khatduh jong ka Asian Para Games, ha kaba ka la kynjoh sha ki 114 tylli ki takma, kynthup ïa 30 ki takma ksiar, ha ka sngi Thohdieng ha Aichi-Nagoya.
Ha kane ka sngi, ka India ka la khur khyndai tylli ki takma, kaba long kaba bun tam na baroh ki sngi jong kane ka lympung hadien ba ka la lah ban khur ïa ka nam lahduh na ka jingïalehkai badminton, archery, shooting bad athletics.
Kane ka kynhun jong ka ri ka la lah ban pynkut da kaba khur 30 tylli ki takma ksiar, 35 tylli ki takma rupa lem bad 49 tylli ki takma rnong ha kaba ka la tam na kaba la lah ha ka Hangzhou Games kaba la long ha u snem 2023 ba ka la ïoh 108 tylli ki takma, kynthup ïa 27 ki takma ksiar.
Kane ka long ka jingjop ka long kaba kongsan namar ba ka India ka la ïakhun ryngkat bad ka kynhun ïalehkai kaba don 168 ngut, kaba jan mar shiteng ki dei kiba la mihkhmat ïa ka ri ha Hangzhou.
Wat hapdeng ka jing-khur takma ha kane ka sngi kaba khatduh, ka India ka la ïai bat ïa ka kyrdan basaw.
Kumba ka paw ka India ka dang long ka nongïoh takma kaba heh tam, da kaba ka la ïoh 65 tylli ki takma, kaba kham bun 12 tylli ban ïa kaba la dep. Hynrei ha ka sngi Thohdieng, ka la lah ban pynpaw ïa ka jingtbit na ka jingïalehkai badminton bad ban khur takma ksiar na ka shooting bad archery.
U nongkawang sum ba paw u Sumit Antil u la lam-khmat ïa ka jingïakhun kaba 1-2-3 jong ka India ha ka jingïalehkai F42-44/61-64 jong ki shynrang. Une u nongjop ha ka Paralympic bad uba long u lahduh ha ka pyrthei u la kawang haduh 72.46m ban ïada ïa ka nam lahduh, katba u Mahendra Gurjar u la khur ïa ka takma rupa da kaba kawang 59.03m bad u Sandip Sanjay Sargar u la ïoh ïa ka takma rnong da kaba kawang 64.48m.
U Pranav Soorma u la ïoh biang sa kawei ka ksiar ha ka club throw F51 jong ki shynrang, da kaba ïada ïa ka nam lahduh jong u da ka jingpyrshang kaba 32.87m kaba long ka rekod ha kane ka lympung. U Dharambir u la khur ïa ka takma rnong da kaba kamai 27.71m.
U Sandeep u la thaw ïa ka rekod ha ka pyrthei ha ka jinglah ban mareh 400m T64 jong ki shynrang da kaba pyndep ha ki 52.28 sekhon na ka bynta ban khur ïa ka takma ksiar. U rangïalehkai ka India u Ajay Kumar ruh u la khur ïa ka takma rnong da kaba pyndep ha ki 53.61 sekhon.
U Haney u la khur biang sa kawei ka rekod ha ka pyrthei, da kaba kawang 60.49m na ka bynta ban khur ïa ka nam lahduh jong ki shynrang ha ka javelin F37/38. Ka India ka la khur ruh ïa ka takma rupa lyngba ka Nimisha Chakkungalpa-rambil ha ka long jump T47 jong ki kynthei bad u Parmod Bijarnia ha ka 1500m T46 jong ki shynrang, ha kaba u la pyndep ha ki 4:09.65.
Ka kynhun ki nongïa-lehkai badminton jong ka India ka la khur lai tylli ki takma ksiar, ha kaba la ïalam da u Nitesh Kumar u nongjop ha Paris Paralym-pic bad u Naveen Sivaku-mar uba la mihkhmat nyng-kong ha kane ka lympung.
U Nitesh u la pynliem ïa u rangïalehkai uba la khur takma ksiar ha ka Tokyo Paralympic u Pramod Bhagat da 21-18, 21-16 ha ka jingïakhun final para marwei jong ki shynrang SL3. Hadien kane u la pyndap sa ka takma rupa ha ka mixed doubles SL3-SU5 ryngkat bad ka Thulasi -mathi Murugesan.
Ha kawei pat ka liang u Naveen u la pynliem noh ïa u rangïalehkai na Indonesia u Fredy Setiawan da 21-9, 21-17 na ka bynta ban khur jingjop ha ka jingïakhun para marwei SL4.
Ka Thulasimathi ka la lah ban pynsah kynmaw ïalade ha ryngkat ka jingïalehkai lang bad ka Manasi Joshi ban khur ïa ka ksiar ha ka women’s doubles SL3-SU5. Kitei ki arngut na India ki la lah ban pynliem ïa ki nongïalehkai na China ïa ka Yang Qiuxia bad Xiao Zuxian da 21-16, 21-13 ha ka jingïakhun phainal.
