Jowai, Risaw 31
Ka Sohmynting k ala buh jaka ïalade sha ka semi final jong ka lympung ïalehkai 1st Division Football Tournament (12th Chatister Kharkongor Memorial Trophy 2024) ba la pynïaid da ka West Jaiñtia District Sports Association (WJDSA).
Kane ka la wan hadien ba ka la pynliem noh ïa ka Sabahmuswang da 1-0 kol ha ka Sngi Palei ha Kiang Nangbah Stadium, Jowai.
Kane ka jingjop jong ka Sohmynting ka la wan urlong lyngba ka kol kaba la kum thep bakla da u rangïalehkai ka Sabahmuswang u Ïohi Ksan Lyngdoh ha ka minit kaba 25 bad kane ka kol kala neh haduh kaba kut jong ka por ïalehkai.
Ka Sabahmuswang lyngba ka jingbym lah ban ïalehkai bha ha kane ka aïom ka la hiar noh sha ka kyrdan 2nd Division ha ka aïom ka ban wan.
Ka jingïalehkai ha ka sngi Thohdieng kan long hapdeng ka Mooknor Thadmuthlong pyrshah ïa ka Mukhla Evergreen ha ka por 2 baje nohphai sngi.
