Jowai, Risaw 31
Ka shlem treikam u Deputy Commissioner, West Jaiñtia Hills District ha ryngkat ka shlem u District Sports Officer ha ka Sngi Palei ka la pynlong ïa ka jingïakop mareh ba la tip kum ka ‘Freedom Unity Run’ kaba long shi bynta jong ka Fit India Swachhta Freedom Run 5.0 bad ka National Unity Day Run, 2024 (Rashtriya Ekta Diwas).
Ha kane ka jingïakop mareh la shim bynta haduh 260 ngut ki khynnah shynrang bad kynthei bad la kaweh ïa ka lama da u Bah EMH Passah, Working President ka West Jaiñtia District Sports Association (WJDSA) na Kiang Nangbah Stadium, Ladthadlaboh, Jowai.
Ki nongjop ha ka liang ki shynrang ki long u Dabit Dkhar na ka shnong Sabamuswang u la rah ïa ka nam lahduh, u Dasaman Kyndait na Sabahmuswang u la wan ba-ar bad balai u Daioohimitre Suting na Sohmynting.
Ha ka liang ki kynthei ïa ka nam lahduh la rah da ka Lamsuk Phawa na ka shnong Mukhaïalong, ba-ar ka Marwa Shylla na Sabah Muswang bad ïa ka kyrdan balai da ka Himonki Khaii na Lumsyrmit.
Ïa ki nongjop la sam da ki khusnam pisa kiba la dep pynkhreh bad ki jing-ai sngewbha.
La pynkut ïa ka jingïa-lang da ka jingsam ïa ki khusnam bad ka jingpule ïa ka jingkular ba la ïalam da u District Sports Officer u Bah Khroobok Passah.
