Shillong, Risaw 31
U Ruud van Nistelrooy u la ïoh ban lehkmen kum u coach ba shipor hadien ba ka Manchester United ka la lah ban pynliem ïa ka Leicester da 5-2 kol na ka bynta ban jam sha ka quarter-final jong ka League Cup ha ka sngi Palei, katba ka Manches-ter City ka la shah rem noh da 2-1 kol ha ka Tottenham.
Ka Arsenal bad ka Liverpool ki dei kiwei pat ki kynhun kiba lah ban buh jaka sha ka quarter final, hynrei ka Chelsea ka la shah rem noh da 2-0 kol ha ka Newcastle.
Kum u khlur ïalehkai barim ka United, u Van Nistelrooy u la shah pynrung ha ka kam kum u nongpynïaid ba shipor hadien ba kane ka klob kaba na Old Trafford ka la weng noh ïa u Erik ten Hag ha ka lah sngi U Blei hadien ba kam shym la lah ban ïalehkai bha ha kaba sdang jong kane ka aïom.
U Ruben Amorim, u coach jong ka Sporting Lisbon, u dei u briew uba ka kynhun ba khlaiñ bor jong ka England, ka la thmu ban pynkhamti ïa katei ka kam, hynrei ïa mynta ka jingïakren ka dangïaid shakhmat.
Katkum ki khubor na Portugal, la ong ba u Amorim un dangneh beit ha ka Sporting na ka bynta ki lai tylli ki jingïakhun ban wan shwa ba un pyndep ïa ka jingïalehkai bar ri ha u Naiwieng mynta u snem.
U Van Nistelrooy u la ong shwa ka jingïalehkai ba ka United “ka lah ban long kaba ym lah ban khanglad” haba “ki nongïalehkai, ki nongtrei bad ki nongkyrshan ki ïatylli” bad ki la pynkut noh da kaba thep saw kol ha ki 45 minit.
Ka jingpyrshang ba phylla jong u Casemiro ban pynkhih jar ka la wan urlong hashwa ba u Alejandro Garnacho un pynbud ïa ka kol kaba ar lyngba ka jingïarap lang da u Diogo Dalot na ka bynta ban pynïoh mynsiem katei ka kynhun jong u Van Nistelrooy, uba la sngewkmen halor kane ka jinglah ban thep kol.
U Bilal El Khannouss u la lah ban pynphai kylla na ka bynta ka Leicester ha ka minit kaba 33. Ka jingïoh ban pyndei ïa ka bol ha ka free kick lyngba u Bruno Fernandes ka biang pura ïa ka United ban thep kol hashwa ba u Casemiro un thep biang ïa ka kol kaba ar ka jong u na ka bynta ban pynlong ïa ka United ban tam da saw kol ha ka kylla step.
Watla u Conor Coady u la ïoh ïa ka kabu kaba biang na ka bynta ka Leicester hynrei ka United ka la lah ban khanglad na ka jingshah ïa ka kol kaba ar. Ha ka kylla miet u Fernandes u la pynbud biang ïa ka kol kaba ar ka jong u na ka bynta ban pynlong ïa ka United ban khur syndon ïa ka jingjop hadien ba ka liang pyrshah kam shym la lah shuh ban pynphai haduh kaba kut.
Haba phai sha kawei pat ka jingïakhun, ka City ka bym shym la pynmih madan ïa u Erling Haaland ka la long ka jingplie lad ïa ka Totten-ham ban pynurlong ïa ka jingangnud kaba la ïai ap khmih lynti la 16 snem ban khur ïa ka jingjop.
U Timo Werner u la ïoh ban pynkhih jar nyng-kong eh ha ka minit kaba 5 hadien ka jingïarap pynbuh bol da u Dejan Kulu-sevski. Ïa ka kol kaba ar la thep da u Pape Sarr, uba l shut na jngai ha ka minit kaba 25. Hynrei shwa ban kut ka jingïalehkai jong ka kylla step ka City ka la lah ban pynphai kylla shi kol lyngba u Matheus Nunes (45+4).
Ha ka kylla miet ka City kam shym la lah shuh ban pynphai bad na ka liang u Pep Guardiola um shym la ailad ïa u Haaland ban mih madan haduh kaba kut ki 90 minit bad ka la mad ïa ka jingshah rem.
Ha kawei ka jingïa-khun, ka Liverpool ka la jop da 3-2 kol ha ka jing-leit ïakhun pyrshah ïa ka Brighton bad u Cody Gakpo u la thep ar kol.
U Gakpo u bym shym la lah ban thep kol ha ka Premier League ne ha ka Champions League mynta ka samoi, hynrei mynta u la thep saw kol ha ki ar tylli ki jingïalehkai ha ka League Cup.
Ka Arsenal ka la pynliem noh ia ka klob jong ka Championship ka Preston da 3-0 kol. Ïa kine la thep da u Gabriel Jesus (24), Ethan Nwaneri (33) bad u Kai Havertz (57).
Haba phai sha kawei pat ka jingïakhun, ka Newcastle ka la lah ban pynliem ïa ka Chelsea na ka bynta ban ai mynsiem ïa u manager u Eddie Howe. Ïa kine la thep da u Alexander Isak (23) bad kawei pat la ïarap pynthep da u rangïalehkai ka liang pyrshah u Axel Disasi (26).
