Islamabad, Naiwieng:
Kum shi bynta ban iakhun ia ka jinghiar ha ka ioh-ka kot hapoh ka ri, ka Pakistan ka la kyrpad ia ka ram ba 10 Billion Yuan (kumba USD 1.4 Billion) na ka China, kaba long ka paralok kaba ju iatrei lang bad ka na ka por sha ka por.
Ia kane ka khubor, la bna pyrthei ha ka Sngi Saitjaiñ hadien ba ka Pakistan ka la sngewkhia halor ka jinghiar jong ka ri ha kiba bun ki liang khamtam eh ka jing-iakynduh jingeh ban pynbit-pynbiang ia ki jingdonkam jong ka ri namar ka jinghiar ka ioh-ka kot ha kine ki snem ba la leit.
Ha ka jingiakynduh bad u Myntri ka tnat pla tyngka jong ka China, u Liao Min, u Myntri ka tnat pla tyngka jong ka Pakistan, u Muhammad Aurangzeb u la kyrpad ia utei u nongialam ka China ba un ialeh ban kyntu ia ki nongialam ka China ba kin pyrkhat lem na ka bynta ka jinglong-jingman ha Pakistan bad ban iarap ban kyntiew lang markylliang khamtam ha ki khep jong ka khia-ka shon kumba ju iatrei lang baroh shi katta na ka bynta ka bha ka miat bad ka jingkyntiew ia ka jinglong-jingman bad ka jingiadei jong baroh arliang ri.
Kane ka jingkyrpad na u Myntri ka tnat ïada jong ka Pakistan, ka long ruh ha ka por ba ki iakynduh ha ka jingialang ba shisien shisnem jong ka International Monetary Fund (IMF) bad ka jing-ialang jong ka World Bank. Kumta lada ka China ka mynjur ia katei ka jingkyrpad jong ka Pakistan, ka Pakistan kan ioh la kumno-kumno 5.7 Billion ka pisa ba kan shim kum ka ram bad kan hap ban siew pyndep pat katkum ki jing-iakut bad ka China.
