Kyiv, Naiwieng:
U President ka Ukraine, u Volodymyr Zelensky ha ka Sngi Thohdieng u la pan jingbit na ki para marjan ri ka Ukraine ba kin aibor ia ka Ukraine ba kan pyndonkam ia ki ‘namding ‘Long-range’ ban ther sha Russia, kum shi bynta ban ialeh pyrshah ia ka jingpyndonkam jong ka Russia da ki shipai jong ka North Korea.
Namar ka Ukraine ka la iathuh ba ka la dep iohi ia kitei ki shipai ka North Korea kiba ka Russia ka la pynieng ha man ki bynta kiba ka thmu ban phah leit tur ia ki. Kumta, u Zelensky u la ong ba ka Ukraine kam banse ban wad lad ban ioh pyndonkam noh da ki tiar thma kiba kham khlaiñ bor, lym kumta kan ym lah shuh ban ialeh pyrshah ia ka Russia.
U Zelensky u la kynnoh ruh ba ki para-lok jong ka Ukraine ki ap haduh ba ka Russia kan da thombor ia ki paidbah jong ka Ukraine, ha ka jaka ba kin phah jingïarap lane phah ia ki tiar thma bad ki ‘namding kiba khlaiñ bor sha ka Ukraine ba kan lah ban pynkhreh lypa haba iadei bad kane.
