Beirut, Naiwieng:
Ka kynhun lehnoh Hezbollah jong ka Lebanon ha ka Sngi Saitjaiñ ka la pyntip ba ka la ioh ban ther bom shajan ka jaka ba don ka tnat syntiat jong ka Israel ha ka nongbah Tel Aviv ha katei ka step.
Na ka liang katei ka kynhun lehnoh ka la pyntip ba ka la ioh ban siat ia u ‘namding ba khlaiñ bor sha ka jaka treikam ka tnat syntiat ka Israel sha Glilot jong ka tnat shipai 8200 ka Israel ha ka por kumba 2:30 jong ka step Sngi Saitjaiñ.
Namar la ong ba ka Hezbollah bad ka Israel ki la ia pyni bor mar-kyl liang mynta la shi snem naduh ba ka Israel ka la leit ban hiar thma ia ka Hamas sha Gaza Strip bad ka Hezbollah ka la dep byrngem naduh ba sdang ia ka Israel ba kan pyni da ki kam thombor jong ka lada ka Israel kam sangeh noh ia ka jingleit hiar thma sha nongbah Gaza.
Hynrei, na ka liang ka Israel ruh khlem da salia ia ka jingbyrngem jong katei ka kynhun lehnoh ka Lebanon, ka la pyni da ka bor na ka por sha ka por haduh ba kan da phah syndon ia ki shipai jong ka ha kane ka por ban leit tur sha shiliang u pud jong ka Lebanon.
