Paiporta, Naiwieng:
Katkum ki khubor la ong ba ki paidbah ka Spain ha ka jingsngew bitar ia ka jingbym lah ban pynbiang jong ki bor pynïaid ia ki lad jing-iada bad ki jingïa-rap na ka bynta ki paidbah nongshong shnong hadien ba ki la shah ktah na ka jingshlei um kaba shyrkhei ha kine ki taiew ba la leit, ha ka Sngi U Blei pat ki la beh bad kawang ktieh ia ki heh kiba leit rung sha kitei ki bynta ba la shah ktah jur na ka jingshlei um.
Kumta la ong ba ha katei ka sngi, ki paidbah nongshong shnong jong ka Paiporta ki la pynpaw ka jingbitar kaba jur ia u Myntri Rangbahduh katei ka ri- u Pedro Sanchez bad kumjuh ruh ia u heh jong ka thaiñ Valencia, ha kaba ia kitei ar ngut ki nongialam la ïada bad pynkynriah noh mar-mar da ki nongap pahara namar ka jingbitar jong ki paidbah kaba la buh jingma ia ka jingim jong kitei ki nongialam haba ki leit ban jurip sha kitei ki shnong ba shah ktah na ka jingshlei um.
Kumjuh ruh la ong ba ki paidbah katei ka thaiñ ki la pynpaw ia ka jingbitar halor ka jingeh kaba ki iakynduh ha kane ka por, da kaba kawang ktieh wat ia u King Felipe VI bad ka Queen Letizia kiba la shah kawang ktieh naduh khlieh haduh kjat katba ki dang leit sha katei ka thaiñ ban pyn jai-jai ia ki paidbah.
Namar la ong ba ki paidbah ki la sngew bitar haduh katta-katta halor ki rukom leh jong ka sorkar haba iadei bad ka jingshlei um kaba la wan lynshop ia kitei ki bynta jong ka Spain ha ki taiew ba la leit. Namarkata, la ong ba ki paidbah ha kane ka por, kim ailad shuh wat tang ia ki bor pynïaid lane ki heh sorkar ba kin leit tur sha kitei ki shnong namar ki paidbah ki ngeit ba ki bor pynïaid kin ym leh eiei hi ruh ban iarap ne pyllait ia ki na katei ka jingeh ba ki iakynduh ha kane ka sien.
Na ka liang u Syiem bad ka Syiem ki la leit poi sha katei ka thaiñ ha ka por shiteng sngi ha katei ka jaka phang pdeng ba la shah ktah jur tam eh ha katei ka jingshlei um. Hynrei la ong ba ki paidbah ki la kawang ktieh bad kim burom shuh wat ia kitei ki syiem jong ka ri ruh namar ka jingsngew bitar halor ka jingduh noh ia ki baieid- bathoiñ bad ki bahaiing- bahasem na katei ka jingjia kaba shyrkhei tam ba katei ka ri kam ju ioh mad shuh mynta da ki phew snem.
Hynrei, mar kumta hi la phah kham bun ia ki bor pahara ban leit synran bad pahara ia kitei ar ngut ki syiem bad la ioh ban pynkynriah noh ia ki na katei ka jaka ba bun paid bad ki la lait na ki jingma ha katei ka sngi.
