Shillong, Naiwieng 04
Ka rukom pynkhreh-pynkhrum ïa ka jingïalehkai kaba ar jong ka Ranji Trophy 2024-25 (Elite Group-A) ha madan MCA kaba ha Polo ka la ïaid biang shakhmat. Ha kane ka kynti ka kynhun ïalehkai ka Jylla kan mih madan ban ïakhun pyrshah ïa ka Jammu and Kashmir ka ban sdang naduh ka Sngi Balang mynta ka taïew.
Kumba ka long mynta ban ïoh ïa ka lad ban wanrah ïa kane ka lympung ïalehkai ha la ïing kam long satia ka kam kaba suk, namar hangne donkam ïa ki ‘riew shemphang bad ki nongtrei (curator & ground staff) ba kin hap ban trei minot da ki bun bun ki bnai khnang ban lah ban pynlong ïa ka madan ïalehkai (pitch) kaba biang nadong shadong, kaba mynta ka kynti, ka la ïoh ka jingpyrto bha na ki bor ba dei khmih jong ka BCCI.
“Ka long ka khyllipmat kaba sngew sarong ban ïoh ïa ka jingpyrto na ka BCCI naduh ki Neutral Curators, Match Referees, Umpires bad kumjuh na ki nongïalehkai na kiwei pat ki jylla, kaba kane ka madan ka don ïa ka jait madan kaba tip kum ka Table of 9 wickets (pitches) ” la pynpaw u President ka MCA u Naba Bhatacharjee, ha kaba u la kam shuh shuh ba kitei baroh ki ñiew bad buh ïa kane ka madan hapdeng ka kyrdan kaba 7 ne kaba 8 ha ka ri hi baroh kawei.
U Naba um lah ruh ban khlem da pyrto bad ai nam ai burom ïa la u jong u para dkhot katta u Bah Peter J. Lamare (BCCI-qualified curator) bad ïa u Pobitro Rabha (chief groundsman) bad ki briew kiba la don kti lang ban lah saiñ dur bad pynlong ïa kane ka madan kumba ka dei ba kan long.
Kumba ka long mynta ka Meghalaya ka la lah ban pynlong lai tylli ki jingïakhun, kaba ka kynhun ïalehkai ka Jylla, ka la mih madan ban aireng pyrshah ïa ki kynhun kiba la paw bad tbit bha.
Dei na kine ki lai tylli ki jingïakhun ba la shem bad ïohi ba ka kynhun ka Jylla ha baroh ki ar kylla jong ka jingïalehkai ba ki la lah ban kamai 461 ron, kaba kren shai kdar ïa ka dak jong ka jingsdang ban tbit bad skhem bha ka jingtied (batting), kampher wat lada dangdon bun ki bynta kiba kum ka kynhun kan danghap ban trei shitom na ka bynta ban pynjanai bha ïalade.
Kumta ha kane ka jingïakhun ka ban long ha ka Sngi Balang la khmih lynti ba kan long ka jingïalehkai kaba kham itynnad bad ba ka kynhun ïalehkai ka Jylla kan lah ban ïakhun tyngeh naduh ki nongtied bad ki nongkawang bol na ka bynta ban pynurlong ïa ka jingjop.
