Seoul, Naiwieng:
Ka South Korea ha ka Sngi Balang ka la pyntip ba ka North Korea ha ka Sngi Ba-ar ka la ther ‘namding biang bad ka long ruh ka sien ba ar tang hadien katto-katne sngi ba ka la pynher ‘namding teng. Ka jingpynher ‘namding jong ka North Korea ha kane ka sien ka dei ruh ha kum kane ka por ba ka United States ka dang pynkhreh ia ka ilekshon President ka ban sa long shen mynta u bnai.
Na ka liang ka North Korea pat, ka la pyntip ba ka la pyrshang pynher ia utei u ‘namding jong ka sha ki bynta Mihngi jong ka duriaw jong ka, ia kaba ka South Korea ka ju khot da ka ‘East Sea’ lane kaba ju ia tip paidbah kum ka duriaw ‘Sea of Japan’.
Haba iadei bad kane, ka Japan ruh ka la pyntikna ba ka tnat ïada ri ka la iohi ia utei u ‘namding ba la pynher da ka North Korea ha katei ka step.
Kumta, la suba ba ka North Korea ha katei ka sngi ka la pyrshang pynher ia u ‘namding bathy-mmai jong ka, uba ju khot u ‘Intercon-tinental Ballistic Mis-sile’ (ICBM).
Kane ka long ka sien ba nyngkong ia ka North Korea ban pynher ‘namding hadien ba ka la shah kynnoh bad shah pynrem halor ka jingphah ia ki shipai jong ka sha ka Russia.
