Shillong, Naiwieng 06
Ka Chipakkore ka la rung sha ka quarter final jong ka Meghalaya State League 2024 hadien ba ka la lah ban pynliem ïa ka Pinggera Doogisik da 3-2 kol ha ka jingïalehkai kaba khatduh jong ka Group-A ha ka Sngi Balang ha Tura.
Lyngba kane ka jingjop, ka Chipakkore ka la long ka kynhun kaba khlem shah rem da kaba ïoh 7 poiñ, katba ka Lumsohkhlur ka la hiar sha ka kyrdan ba-ar bad don 6 poiñ.
Ka jingïakhun ha ka Group-B ka la long kaba kham eh hadien ba ka Mawten ka la pynliem ïa ka Riangdo Youth da 3-1 kol. U Arnest Lyngdoh (3) u la pynkhih jar nyngkong ïa ka Mawten, hynrei u Kordor Amora (62) u la pynïakhaid kylla ha Mawkyrwat. Wat la ka la long ka jingïakhaid, hynrei u Arrowstar Wanñiang (90+1) bad u Wiseman Kharsyiemïong (90+5) ki la ïoh thep kol bad pynlong ïa ka Mawten ban ïoh 3 poiñ.
Kane ka mut ba ka Mawten, Khliehmawlieh bad ka Sutnga ki la ïaryngkat mar 6 poiñ ha kane ka group. Kumta ka tournament committee jong ka MSL kan sa pynshai ïa ka kyrdan jong ki kynhun hadien ka jingïalang ha ka Sngi Palei.
Ha Khliehriat, ka Rymbai Skhenshynriah ka la pynliem ïa ka Mulait United da 3-0 kol lyngba ki kol ba la thep da u Hesmiki Rymbai (39 & 58) bad u Ïaishah Bareh (52′) hynrei kane kam shym la biang satia ïa kane ka kynhun ban knieh ïa ka kyrdan ba nyngkong na ka Rangdajied United. Wat lada ryngkat mar 7 poiñ, hynrei ka RUFC ka la tam ha ka jingïapher kol (+10 haduh +8). Wat la katta ruh, ka R Skhenshynriah kan dang ïoh rung sha ka quarter final kum kawei na ki ar tylli kynhun ba tbit tam kiba wan ha ka kyrdan ba-ar.
Khatduh ha ka Group-F, ka Pynursla United bad ka Mawmluh ki la ïakhaid mar da 2-2 kol. U Riborlang Dkhar (7) bad u Seiborlang Khongmawloh (24) ki la thep kol na ka bynta ka Pynursla, hynrei u Balajiedlang Lyngwa (37 & 82) u la lah ban pynphai na ka bynta ban ïasam mar shi poiñ.
Ka jingïakhun kaba khatduh na 36 tylli ki jingïalehkai group kan long mynta ka Sngi Palei ha ka Group-C. Ka Seven United kan ïakhun pyrshah ïa ka Nangkiew Shaphrang Lumdiengngan ban ïaknieh rung sha ka kyrdan ba-ar. Baroh kine kynhun ki la ryngkat mar 3 poiñ na ar tylli ki jingïakhun, ha kaba ka Lumdiengngan ka la tam lyngba ka jingïapher kol (0 haduh -2).
