Shillong, Naiwieng 06
Ka Shillong Lajong FC bad ka Mawlai SC kaba long la lahduh jong ka aïom ba la lah, ki la pyni ïa ka mynsiem ïakhun hakhmat ki paidbah nongkyrshan bad ha kaba kut ki la ïakhaid mar 1-1 kol ha ka OC Blue Shillong Premier League 2024 kaba la long ha ka Sngi Balang ha SSA Stadium, Polo.
U Damanbhalang Chyne (70) u la pynkhih jar na ka bynta ka Mawlai, hynrei u Yohaan Benjamin (82) u la lah ban pynïakhaid ha shwa ban wai na ka bynta ka Lajong.
Kane ka dei tang ka jingïakhaid kaba ar ha ki 16 tylli jingïalehkai mynta ka samoi bad ka la pyni haduh katno kine ki ar tylli ki kynhun ba ha khlieh duh ki long kiba ïabiang bor. Kane ka jingïakhaid ka la pynlong ïa ka Lajong ban dang ïai bat ïa ka kyrdan ba nyngkong ha ka miej kheiñ point jong ka SPL. Ka SLFC bad ka Mawlai ki kamai mar 7 point, hynrei ka Lajong ka la tam lyngba ka jingïapher kol (+5 haduh +4).
Baroh ar tylli ki kynhun ki la duh ïa ki nongthep kol kiba kynsai ha kaba u Deibormame Tongper ka Lajong u la shong shabar, katba u Khrawkupar Jana jong ka Mawlai u la ïoh ban mih bujli hadien ka jingïakhaid namar u coach u Bah Hering Shangpliang u la khmih lynti ban pynurlong ïa ka jingjop.
Ha ka kylla step kine ki kynhun kim shym la lah ban thep kol, haba u rangïalehkai ka Mawlai u Donlad Diengdoh u la ïoh ban shut ha ka minit kaba saw. Nangta u nongapkol ka Mawlai u Lambhamiki Lamare u la lah ban khanglad ïa ka jingpyrshang u Yohaan.
Ka la shim por palat shi kynta na ka bynta ban thep ïa ka kol kaba nyngkong bad ka la wan urlong hadien ba u Robert Khongriah u la shut na kyndong ha kaba u Damanbhalang, u la pyndei da ka khlieh na ka bynta ban pynkhih jar.
Kumba ka paw kane ka sngi kam shym la long kaba biang na ka bynta u Yohaan ha kaba u la pynlehnohei ïa katto katne ki kabu ksiar, hynrei u coach kane ka kynhun u Bah Bobby Lyngdoh Nongbet u la ïai bteng ban ailad ïa u bad ha kaba khatduh u la lah ban pynurlong lyngba ka jingïarap pynbuh da u Kynsaibor Lhuid.
Lyngba kane ka jingïakhaid ka Lajong ka la long kaba kmen eh ban kamai tang shi point, hynrei ka Mawlai ka danghap ban ïakhun tyngeh na ka bynta ban pynurlong biang ïa ka nam lahduh ha ka SPL mynta u snem.
Ka jingïalehkai ha ka Sngi Palei kan long hapdeng ka Sawmer SC pyrshah ïa ka Langsning FC ha ka por 2:30 janmiet.
