Mawkyrwat, Naiwieng 08
Ka kynhun ïalehkai jong ka Ryntiehlang FC ka la rung sha ka quarter final ha ka Golden Jubilee Celebration Football Tournament ba la pynïaid da ka Nonglang SC, hadien ba ka la lah ban pynliem noh ïa ka Sohkhyllam SC da 1-0 kol ha ka Sngi Thohdieng ha madan Pynden ïew Lyngdoh, South West Khasi Hills District.
Haba phai sha katei ka jingïalehkai ka long kaba itynnad bad ïakhaid haduh katta-katta. Ha ka kylla step baroh ar ki kynhun kim shym la lah ban pynkhih jar wat la shibun ki kabu ki la ïoh bad haduh bakut ka kylla step ka jinglehkai ka la shu kut noh ha ka jingïakhaid.
Haba phai sha ka kylla miet, ka Ryntiehlang lyngba ka rukom pynpher ïa ka jinglehkai ka la ïoh ban pynkhih jar ha ka minit 71 lyngba u Teibor Wahlang.
Ka Sohkyllam wat ka la shah tam shi kol kam shym duh jingkyrmen bad ïoh ruh shibun ki kabu ksiar, hynrei kam shym la lah ban thep kol haduh bakut jong ka kylla miet. Ïa ka nam Player of the Match ha katei ka sngi la ïohpdiang da u Teibor Wahlang jong ka Ryntiehlang bad ïa katei ka khusnam la sam da u Bah Rishotroy Kharjahrin.
Na ka liang ka Nonglang SC ka la pyntip ruh ba ka jinglehkai ka ban bud kata ha 12 tarik kan long hapdeng ka Evergreen S&CC pyrshah ïa ka Spirit Warrior FC ha ka por 2 baje noh phai sngi.
