Shillong, Naiwieng 08
Ka lahduh jong ka aïom ba la dep, ka Rangdajied United FC kan ïakynduh pyrshah ïa ka lahduh jong ka MSL 2019, ka Shillong Lajong FC ha ka quarter final jong ka Meghalaya State League 2024, la pynbna ka Tournament Committee ha ka Sngi Thohdieng.
Ka Lajong ka la lah ban pynliem teng ïa ka Rangdajied ha ka final jong u snem 2019 na ka bynta ban rah ïa ka nam lahduh. Ka Rangdajied ruh ka la lah ban pynliem teng ïa ka Lajong ha ka semi final jong u snem 2023.
Kumjuh ar tylli ki kynhun na Jaiñtia Hills kata ka Sutnga (East Jaiñtia) bad ka Ladthadlaboh (West Jaiñtia) kin ïakhun pyrshah ha ka quarter final ba ar, katba ka Chipakkore kan ïakhun pyrshah ïa ka Rymbai Skhenshynriah.
Ha kawei pat ka liang, ka Mawlai kaba long ka lahduh ha ka Shillong Premier League 2023, kan ïakynduh pyrshah ïa ka Khliehmawlieh ha ka quarter final basaw. Ka Khliehmawlieh ka la pynliem ïa ka Mawlai ha Shillong ha ka semi final jong ka MSL 2023 ha shwa ba kan shah rem ha ka Rangdajied ha ka final.
Na ka liang ka Tournament Committee kan sa pynthikna ha kaba ïadei bad ki tarik bad ki jaka ban pynlong ïa kitei ki jingïakhun quarter final.
Ka MFA dang shen ka la shim ïa ka rai ban pynsangeh shwa ïa ka MSL hadien ba la kut ki jingïalehkai group na ka bynta ban ailad ïa ka kynhun ïalehkai ka Jylla ba kan pynkhreh ïa ka National Football Championship (Santosh Trophy 2024-25), ka ban sdang ha kaba kut jong mynta u bnai.
Ka jingïalehkai group jong ka MSL ka la kut ha ka Sngi Palei bad mynta ka sngi la pynthikna ba ka Sutnga ka dei kaba la jop ha ka Group-B ha Mawkyrwat. Ha kane ka group ka la mih kynrum-kynram khyndiat namar lai tylli ki kynhun ki la kamai mar 6 poiñ kita Sutnga ryngkat ka Khliehmawlieh bad ka Mawten. Kumta ka Khliehmawlieh ka la long ka kynhun kaba wan ba ar ban ïoh rung sha ka quarter final.
Ka Rymbai Skhenshynriah ka la long ka kynhun kaba tbit da kaba kamai 7 poiñ, katba ka Khliehmawlieh bad ka Lumsohkhlur ki la ïoh mar 6 poiñ bad ka jingïapher kol kaba mar katjuh (+1) hynrei ka Khliehmawlieh ka la ïoh thep kham bun kol (5 la 4).
