Queretaro, Naiwieng:
Ki pulit ka Mexico ha ka Sngi U Blei ki la iathuh ba 10 ngut ki la khlad na ka jingshah synreit kuli ha ki runar kieng atiar ha ka miet Sngi Saitjaiñ hapoh ka nongbah Queretaro jong katei ka ri.
Kane ka la jia ha ka thaiñ ba don kawei ka jaka dih ‘Bar’ ha ki bynta ba kham kyndong jong katei ka nongbah Queretaro, ha kaba 4 ngut ki runar kiba kieng atiar ki la leit ban rung bad ther kuli ia ki 7 ngut ki shynrang bad 3 ngut ki kynthei kiba don ha katei ka jaka. Ha kane ka jingjia, 7 ngut kiwei pat ki dei kiba la mynsaw bad ngat lang ha katei ka jingsynreit kuli jong kitei ki kynhun runar bad ki pulit ki dang ioh bat tang ia uwei u briew uba ki dang pynïaid ia ka jingtohkit bniah haba iadei bad katei kaba la jia ha ka miet Sngi Saitjaiñ.
La ong ba kane ka nongbah Queretaro ha ka jingshisha, kam dei ka nongbah kaba jur ki kam thombor lane ki kam runar jong ki kynhun runar bad ka long ka nongbah kaba kham shngaiñ ban ia kiwei pat ki thaiñ lane ki nongbah jong ka ri Mexico.
Kumta, la ong ba katei ka jingjia ha kane ka sien pat ka la pynkyndit bad pynpar ñiang khriat ia kiba bun ki paidbah nongshong shnong jong katei ka nongbah naba kim pat ju iohmad ne iohsngew ia kum katei ka jingjia ha katei ka thaiñ baroh shi katta. Namar la ong ba ka Mexico ka long ka ri kaba shyrkhei bha haba iadei bad ki kam khaii drok bad ki kam be-aiñ jong ki kynhun runar bad ka long kaba eh ia ki bor pynïaid bad ki pulit ba kin tehlakam ia ki jingsniew kiba la kynrei ha katei ka ri namar ba katei ka ri ka dei kaba la dap da ki kam runar bad ki kam pyntriem jong ki kynhun runar khamtam ki nongkhaïi droks.
Watla katta, ki bor pynïaid ka Mexico ha kane ka por ki la kular ba kin trei shitom ban thwet ia kitei ki runar kiba don kti ha katei ka jingjia baroh bad ba kin pynshitom bad kem ia ki katkum ki kyndon pynkheiñ aiñ ba la buh.
