Philadelphia, Nailar:
Ki bor pyniaid ka Philadelphia, ki dang thwet ïa uwei u briew bym don jingithuh uba ju deng ïa ka dur bula ‘Chucky’ bad uba ju pyntieng- pynsyier ïa ki khyllung- khynnah ha katei ka thaiñ bad u la pynher syrngiew ruh ïa 6 ngut ki briew ha Center City ha kine ki por ba la leit. Ki pulit ka Philadelphi ki iathuh ba kaen ka la jia ha ka step 12 tarik jong ne u Nailar hajan ka surok 15 & Chestnut Streets, shabar jong ka City Hall.
Ki nongtohkit ki iathuh ba ha ka por kaba kumba 15 minit eiei, utei u briew u la thmu ïa ki nongleit jingleit ba lyndet ban pyntieng bad pynshitom bein ïa ki. La iohi ruh ïa utei u briew ba u bat ïa ka smartphone ba la pynmeh, kaba la pynlong ïa ki pulit ban suba ba u lah ban ring dur ïa ki jingiakynduh na ka bynta ka jinglehkai ha ka social media lane ka video kaba la saphriang bha.
Ki pulit ki la iathuh ha ka tnat pathai khubor jong ka Philadelphia, ba utei u briew uba la kah dur ialade, u bat ïa ka phone ha khmat jong kawei ka kynthei bad u la kylli ïa ka bun- bun sien, “Hato phi la kloi ne em ban iap?”
Katkum ki tyllong khubor ba la ioh lum, u Jason Smith, U Kapten Pulit jong ka Philadelphia, u la ïathuh ha ki nongthoh khubor ha ka Sngi Nyngkong ba utei u briew u la rung sha kawei ka jaka bam da kaba phong ïa ka dur-bula kaba kyrpang, kum ka Chucky doll halloween” ha ka por 5:20 baje mynstep. Hynrei katei ka jaka bam ka la kyntait ban iakren ne ban ai bam ïa u namar ka jinglong ba i-kynsha jong u.
