Washington, Nailar:
Uwei u rangbah na India, uba la 56 snem ka rta, u la shah siat iap ha ki runar hapdeng ka jingleit lute jongki na ka dukan jong u kaba don hapoh United States bad la ong ba ki bor pyniaid ka US ki dang thwet bad wad bniah shaphang kitei kiba don kti ha katei ka jingjia.
Ia utei u nong India la ithuh kum u Suresh Parsottamdas Patel bad u dei na ka jylla Gujarat jong ka ri India, na ki thaiñ Mehsana. U la shah siat iap noh ha ki kynhun runar kiba kieng atiar bad kiba leit rung sha ka dukan jongu kaba don hapoh Jackson jong ka Tennessee ha ka 20 tarik u Nailar. La iathuh ba U Patel, u dang shu plie ïa ka dukan thymmai jong u, kaba u la ai kyrteng ka ‘Ridgecrest Cellars’, tang khyndiat sngi hashwa jong katei ka jingjia. Ki pulit ki la iathuh ba ki la ioh jingtip halor katei ka jingjia, dei ha ka por 9 baje jong katei ka miet 20 tarik haba iadei bad katei ka jingshah siat jong utei u rangbah hapoh katei ka dukan jong u hi.
Katkum ka jingiathuh jong ki nongsakhi, utei u briew bym lah ban ithuh, u la rung shapoh dukan, u la sei ïa ka suloi bad u la dawa pisa na ki nongtrei, la iathuh ki pulit ha ka jingthoh ha ka rynsan paidbah ‘facebook’.
Hadien ba u la shim ïa ka pisa na utei u nongtrei, u la siat bun tylli ki kuli bad kiba la leit dei ïa u Patel na kiba bun ki bynta jong ka met jong u. kaba kham sngew shempap ka long ba la iathuh, ba ka khun jong u ruh kaba dang 19 snem ka rta, ka don lang hajan jong u Patel hi, ha ka por ba u shah siat ha katei ka jan miet.
Ki pulit ki la iathuh ba utei u briew u dei u runar u dei u jaitbynriew doh-iong uba phong da ka hoodie rong dpei, ka patlun jeans bad ki juti kiba iong kum ki juti trei.
