New Delhi, Nailar:
Ha kane ka jingjia ba sniewbok, la ong ba utei u nong India, uba dei na ka jylla Punjab, uba shong ba sha ha US, ïa uba la ithuh kum u Gurdeep Singh, 28 snem ka rta, u la shah siat iap ha ki runar bym ithuh dur khmat katba u dang thmu ban pyndep ïa ka kamram jong u kum u nongleit sam jingbam ‘Pizza Delivery’ hapoh ka nongbah New York, ha kaba ki paidbah na ka shnong ba u shong u sah ha Punjab, ki la pynpaw ka jingbitar bad ka jingpyrshah jur halor ka jingshah thombor jong utei u samla nong India khlem da don kano- kano ka daw ne pynthud ïa ka shongsuk- shongsaiñ ha katei ka ri.
Katkum ki khubor, u Gurdeep Singh u la leit poi sha US naduh ki 13 snem mynshwa, hadien ba u la shim ram, da ka jingkyrmen ba un ioh kamai ja-kpoh bad ban wanrah ïa ka lawei kaba bha na ka bynta ki kmie ki kpa jong u haba ki wan phai biang sha India.
U kpa jong u Gurdeep Singh, u Pyara Lal, u la iathuh ba u khun jong u, u la shim ïa ka ram kaba heh ban leit sha US, hynrei hadien ba u la poi hangtei, u la mad ïa ki jingeh kiba bun jait la slem bah. U la trei miet la bad sngi ban pynioh ka jingim kaba suk bad ba ïaid beit – ïaid ryntih ïa ka iing ka sem jong u.
La suba ba katei ka jingshah thombor ka dei na ka daw jong ka jingthmu ban lute. Ki jingtip ba kham bniah kin sa wan tang na ki pulit jong katei ka thaiñ ha ka nongbah New York hadien ynda ki la pyndep ïa ka jingtohkit haba iadei bad katei ka kam. Kumta la ong ba ki bahaiing- bahasem jong u bad ki para marjan jong ka jingsngewsih ka la bthei ha ka shnong Jabowal, ki la dap da ka jingsngewsih tang shu bna ïa ka khubor ka jingshah pyniap jong u khamtam haba u don shabar jong ka ri. Ki bahaïing – hasem kim lah ban pyntngen bad ki don ka jingkyndit kaba jur halor katei ka jingjia ba sngewsih bad kaba la jia ruh pyrshah ïa utei u samla u bym don daw ne dak shun eiei badno – badno ruh hynrei ka jingleit jong u sha katei kawei pat ka ri, ka long tang ban pynbiang ha iing- ha sem kum u khun shynrang ba don jingkit- khlieh jong ka iing.
U Gurdeep Singh u la iehnoh shadien ïa u kpa bad uwei u hynmen. Na ka liang jong ki bahaiing u Gurdeep, ki la kyrpad ïa ka sorkar ba kan iarap ban pynpoi kham kloi ïa ka met jong u sha India. Ki la kyrpad ruh ïa ki bor synshar jong ka US ban shim ïa ki lad ki lynti baroh ban pyntikna ïa ka jingioh kem noh kloi ïa kiba don kti ha katei ka kam thombor pyshah ïa u khun jongki, u bym shym leh be-aiñ ne pynthud eiei ai ki.
