Islamabad:
U Myntri Rangbahduh barim jong ka Pakistan, u Imran Khan, u la shah rah biang noh sha ka patok Adiala Jail, na Shifa International Hospital kaba don ha Islamabad, ong u nongaiktien jong ka seng PTI jongu. U Khan, u la shah kit ban phah peit bniah ha katei ka Hospital, hynrei la phah biang noh ïa u sha patok hadien ba ki doktor ki la pyntip ba ka long kaba shngaiñ ïa u, ba un dang sah ha patok, ong ka khubor jong ki lad pathai khubor jong ka Pakistan.
“Ka kynhun jong ki doktor kiba tbit, ba kynthup ïa u doktor khmat bad kiwei de ki doktor ba dei khmih ha kiba bun ki bynta, ki la pynlong ïa ka jingpeit bniah ïa u bad ki la pynbna ba u long uba koit ba khiah ba un leit phai biang noh sha ka patok ba ju pynshong ïa u baroh shi katta,” la pyntip u Attaullah Tarar.
“Dei hadien ba la pyndep ïa kane ka kam baroh kawei, la pynkynriah biang ïa u sha patok Adiala,” u la bynrap.
Ia une u Myntri Rangbah barim, uba 73 snem ka rta, la pynkit sha katei ka hospital ha ka por shiteng miet, na ka bynta ban phah peit bniah ïa ka jinglong- jingman ka met jong u, hadien ka hukum jong ka Supreme Court, kaba la bthah ïa ki bor synshar ha Islamabad, ba kin ai ïa ka jingsumar ba kyrpang ïa u, hapdeng ka jingthud ha ka koit- ka khiah jong u.
Da kaba kdew na ki tyllong khubor, ka Geo News ka la ïathuh ba ïa ka jingleit jong utei u nongialam ka PTI sha patok bad kumjuh ruh ka jingwan phai la pyntreikam ruh da ka jingpahara kaba skhem bha bad mynta ki la pynshong biang ïa u hapoh ka byndi ba la pynshong ïa u baroh shi katta.
La iathuh ruh ba ha ka por ba la pynkit ïa u sha katei ka Hospital tang kumba katto -katne por, da ki phew ngut ki nongkyrshan jong ka PTI, ki la ïa lum lang hajan katei ka Hospital.
