Washington, Nailar:
Ki bor pyniaid ka US, ki la ioh kem noh ïa uwei u nong India u la shah kem noh bad u la shah pynngat kyndon ha US hadien ka jingkynnoh ba u don kti ha ki kam thok pisa ha ka skhim kaba la pynlut da ki klur tyngka kaba u la thmu khnang tang ïa ki tymmen lane kiba la shongthait na ka kam.
U Jay Sunilbharthi Goswami, 21 snem ka rta, u dei u nongshong shnong trai ka Gujarat, uba sah ha Jersey City, New Jersey, bad ula shah kem ha Canada, ha ka por ba u dang pyrshang ban phet rieh sha Qatar.
La pynngat ïa u hapoh ki kyndon pynkheiñ aiñ jong ka jingleh thok da ki kam ai ram thok bad ka jingthmu ban leh ïa ka kam thok pisa. Kitei ki jingkynnoh ki lah ban pynlong ïa u ban shah set patok ruh haduh kumba 20 snem, ong u nongiasaid aiñ jong ka US, u Michael DiGiacomo ha ka Sngi Thohdieng.
U Goswami, u la leit hajir hakhmat u Magistrate Judge jong ka US, U Mark Pedersen, ha ka 17 tarik Nailar bad la pyllait noh ïa u, hapoh ki kyndon. Hadien shisngi, u la iaid lyngba sha Canada. Ki bor jong ka aiñ ki la ïoh jingtip ba u la buh liengsuiñ na Toronto sha Doha, Qatar, ha ka janmiet jong ka 18 tarik u Nailar.
Ki bor pyniaid jong ka Canada ki la kem ïa u Goswami ha Toronto Pearson International Airport bad ki la kem ïa u ha ka 20 tarik u Nailar hadien ka jingkyrpad jong ka US ban kem shipor haduh ban da pynphai biang ïa u.
Katkum ka jingujor ain, ka IRS Criminal Investigation Division ka la ioh jingtip ha u Kyllalyngkot 2026 ïa ka skhim thok kaba pyndonkam da ka internet bad telephone kaba thmu ïa ki tymmen kiba shah lehbein ha Western District jong ka New York bad sha kiwei pat ki jaka ha US.
La kynnoh ba ki nongleh kam sniew ki la iathuh ha ki nongshah lehbein ba la pynkhein ïa ki bank account, ka pisa ne ki jingtip ba kyrpang jong ki. Nangta ki la pynbor ïa ki ban pynkylla ïa ki mar ki mata sha ka pisa, ka ksiar ne ki gift card shwa ban pynlong kum ki bor pynjari ain ne kiwei kiwei ki briew ban pynjur ïa ka jingleh thok.
Haba don ka pisa ne ka ksiar, la kynnoh ba ki nongthmu ki pyndonkam da ki “kulai pisa” ban lum ïa ki mar kordor na ki nongshah pyniap bad ban pynpoi sha kiwei pat ki dkhot jong ka jingthmu, la ong ka tnat jong ka ain.
La kynnoh ba u Goswami, u la leh kum u kulai pisa, da kaba lum hi dalade ne thmu ban lum pisa bad ksiar na ki tymmen kiba la shah pyndik ha New York bad New Jersey, ym duna ïa ka hynniew sien. Ki hynniew ngut kiba la shah pyniap, kiba don hapdeng ka rta 59 bad 87 snem, ki la duhnong kumba USD 7.5 million, ong ka jingujor.
Ka ejahar ka kdew ruh ba u Goswami u la plie ïa ka Bank Account ha US bad u la thep pisa palat USD 90,000 hapdeng ka 1 tarik u Nailar, 2025, haduh ka 6 tarik u Iaiong, 2026.
Ki nongtohkit ki ngeit ba ki jingthep pisa ki iadei bad ki jingsiew ba u Goswami u la ioh namar ba u la leh kum u nongthep pisa ha katei ka skhim.
