Washington, Nailar:
U President ka United States, u Donald Trump, ha ka Sngi U Blei u la pyni ia ka dur ‘map’ jong ka Strait of Hormuz, kaba long ka lynti ïaid jhad ba kongsan tam ïa ka khaïi- pateng ha ka pyrthei bad u Trump ha kane ka sien, u la kam trai ïa katei ka bynta jong ka duriaw, kum ka bynta jong ka US, kaba la hap mynta hapoh u pud- u sam jong ka US.
Ha ka jingkren jong u hapoh ka rynsan ‘Truth Social’, u Trump u la pyllait ïa ka dur jong ka map kaba la ker sawdong ïa ka jaka ba kongsan eh – kaba la shah khang da ka Iran naduh ba la sdang ka thma ha ka 28 tarik u Rymphang – kum ka bynta ba thymmai jong ka US.
U Trump ha ki por ba la leit ruh u la buh teng ïa kane kajuh ka dur ha ka 18 tarik u Nailar, ha kaba, u la kam trai hi beit ïa katei ka bynta jong ka duriaw Hormuz kum ka bynta jong ka US.
U President jong ka US, ha ka 15 tarik u Nailar, u la pynpaw nyngkong eh ban pynbna ïa ka duriaw kum ka bynta kaba hap hapoh u pud- u sam jong ka US.
“Hadien ba ngi la dep jop ïa ka Iran, kaba la shah rem jur bha, shen ngan sa pynbna ïa ka Hormuz Strait kum kawei na ki bynta kaba long u pud u sam jong ka America”, u la ong ha ka jingialang ha New York.
“Ka long kaba shisha,” la pynksan u Trump.
Ka Iran ka la pynskhem ïa ka jingsynshar jongka hapoh ka duriaw Hormuz, lyngba jongka, kumba shi bynta na ka san bynta jong ka jingshalan umphniang bad LNG ha ka pyrthei kaba la ïaid hashwa jong ka thma bad ka la pynlong ïa ki jhad ban ïoh jingbit bad ban siew shwa ïa ka bai leit- bai wan shwa ban ioh ban ïaid lyngba na katei ka duriaw kaba long ka lynti ïaid jhad. Hynrei u Trump, u kam ba ka US, ka don ïa ka bor synshar kaba pura ha katei ka bynta jong ka duriaw kaba ju hap hapoh ka jingkhmih jong ka Iran baroh shi katta.
