Khliehriat, Naiwieng 12
Ka Dhana bad Ladrymbai B SC ki la ïoh jingjop ha ka Super Division Football Tournament-4th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA).
Kane ka la wan urlong hadien ba ka Dhana SC ka la pynliem ïa ka Rymbai Shkenshynriah SC da 3-1 kol, katba ka Ladrymbai B SC ka la pynliem da 2-1kol ïa ka Khliehriat West YWSC ha ka jingïalehkai kaba la long ha madan EJDSA Artificial Turf, Diengshynrum ha ka Sngi Baar. Ïa ki kol jong ka Dhana SC la thep da u Harita Suchen ha ka minit ba 21, Wanlam Kassar 45 bad Pynio Dkhar 61, katba ïa ka kol jong ka Rymbai Shkenshynriah SC da u Shepherd Ksih 24.
Ha ka jingïalehkai kaba bud, ka Ladrymbai B SC ka la pynliem da 2-1kol ïa ka Khliehriat West YWSC. Ïa ki kol jong ka Ladrymbai la thep da u Rimetre Lyngdoh (30) bad Mihsalan Suiam (71), katba ïa ka kol jong ka Khliehriat West YWSC la thep da u Dawyoo Bhoi (76).
Ha ka 14 tarik Naiwieng ka jingïalehkai kan long hapdeng Thangskai Tiger SC bad Sutnga SSCC ha ka por 11.45 baje mynstep, ka Chiehruphi SYWSC bad Rymbai Iawpynsing SC ha ka por 2.15 baje nohphai sngi.
