Moscow, Naiwieng:
U President ban sa long jong ka US, u Donald Trump, ha ka Sngi U Blei u la phone sha u President ka Russia- u Vladimir Putin ban kyntu ba um dei shuh ban leit hiar thma sha Ukraine lada u kwah ia ka jingiatrei lang bad ka US hadien- habud.
Kumta la ong ba u Trump u la phone bad iakren bad utei u nong-ialam ka Russia ha katei ka sngi, tang hadien ka jingjop jong u ia ka ilekshon President ha ki lai sngi ba la leit, ha kaba u la jop ia ka jingiakhun ilekshon jong u pyrshah ia ka Vice-President jong ka US- ka Kamala Harris.
Pynban haba la kylli bniah ia u da ki nongthoh khubor haba iadei bad katei ka jingiakren phone jong u bad u President ka Russia, u Trump um shym la iathuh bniah bad u la pynpaw ba um pat kwah ban kren eiei halor kane ka bynta hynrei ban ap ia ka por ba un lah ban leh eiei haba iadei bad ka thma hapdeng ka Russia bad Ukraine.
Katba ki nongialam jong ka US ki la pynpaw ha u ia ka jingdonkam ba kyrkieh ban leh eiei noh haba iadei bad ka thma Ukraine bad ban ialeh ruh ban wanrah noh ia ka jingiasuk hapdeng ka Russia bad Ukraine, khnang ba yn lah ban pynkut noh syndon ia katei ka thma hapdeng kitei ar tylli ri.
Namar u Trump naduh ba u sdang ban mih ialap paidbah na ka bynta ka ilekshon ha une u snem, u la kren shaphang ka thma ka Ukraine bad ong ba lada dei ma u ha ka jaka jong u Biden, ka thma Ukraine kan ym shym da jia satia. Kumta ruh u la kular ba lada ki paidbah kin ailad biang ia u ba un long u President bad u nongialam jong ka ri ha kane ka sien, un pyniasuk bad pynkut ia ka thma jong ka Ukraine bad Russia bad un weng ruh ia ki jingeh bad ki jingma kiba bun kiba la ap ia ki paidbah nongshong shnong ka US bad kumjuh ia ka pyrthei baroh kawei.
Dang mynshem taiew u President ka Ukraine u Volodymyr Zelensky ruh u la ioh ban iakren bad u Trump haba iadei bad ka thma Russia bad Ukraine, ha kaba u Zelensky u la ong ba katei ka jing-iakren phone jong u bad u Trump ka long kaba seisoh. Kine nongialam ki la ioh ruh ban iakren halor ki mat ba kongsan kiba iadei bad ka thma jong ka Russia ha Ukraine bad ban nang iatrei lang ruh nangne sha khmat ban wanrah ia ka shongsuk- shongsaiñ hapdeng ar tylli ki ri.
